Wardha : माझ्या वडिलांच्या आरोपींना फाशी द्या... भाजप नेत्याच्या हत्येप्रकरणी दोन वर्षाच्या लेकाची मागणी

चेतन व्यास, वर्धा

Wardha BJP Leader Bharat Nagpal Murder वर्धा जिल्ह्याच्या पुलगांव येथील व्यवसायी भारत नागपाल यांची चंद्रपूर जिल्ह्याच्या बांबर्डा येथील वाळू घाटावर निर्घृण हत्या करण्यात आली. या घटनेतील बारा आरोपींना वरोरा पोलिसांनी अटक केली आहे, तर इतर आरोपींचा शोध सुरु आहे. या प्रकरणातील आरोपींना फाशीची शिक्षा देण्यात यावी तसेच विविध मागण्यांसाठी वर्धा येथे मूक विरोध मोर्चा काढत जिल्हाधिकारी व पोलीस अधीक्षक यांना निवेदन देण्यात आले.या मोर्चात भारत यांचा दोन वर्षाचा चिमुकला वेदराज हा आपल्या वडिलांच्या आरोपींना तात्काळ कारवाई करावी या मागणीसाठी विनवणी करत होता.

भारत नागपाल यांची होळीच्या पूर्वसध्येला वाळू घाटात कट रचून हत्या करण्यात आली होती. नागपाल हे पूलगांव येथील उद्योजक असून भाजपाचा महामंत्री होते. नागपाल यांच्या हत्येचे पडसाद विधानसभेत सुद्धा पाहायला मिळाले.

या घटनेतील बारा आरोपींना फाशीची शिक्षा देण्यात यावी, यासह या प्रकरणाचा तपास सीआयडी कडे देत जलदगतीने करत खटला फास्ट ट्रॅक कोर्टात चालविण्यात यावा या मागणीसाठी वर्ध्यात आज नामदेव मठ येथून मूक विरोध मोर्चा काढण्यात आलं. मोर्चा शहराच्या

मुख्यमार्गाने होत जिल्हाधिकारी कार्यालयावर पोहचला. या मोर्चात भारत यांचा दोन वर्षाचा चिमुकला हातात आपल्या वडिलांना न्याय देण्याची मागणीचा फलक घेऊन होता. सोबतच नागपाल यांचे बंधू दिनेश आणी राम हे सुद्धा उपस्थित होते.शहरात काढण्यात आलेल्या या मूक मोर्चात महिलांची देखील मोठ्या प्रमाणात उपस्थिती होती.यासोबतच पंजाबी समाज आणी मित्र परिवार सुद्धा भारतला न्याय देण्याच्या मागणीसाठी रस्त्यावर उतरलेला दिसला.