Samruddhi Mahamarg Accident: 'समृद्धी'वरुन राजकारण सुस्साट; महामार्गावरील वाहतूक थांबवावी, विजय वडेट्टीवारांची मोठी मागणी

Vijay Wadettiwar:

समृद्धी महामार्गावरील अपघातांची मालिका सातत्याने सुरूच आहे. दर महिन्यात येथून प्रवास करणाऱ्या व्यक्तींना अपघातात आपला जीव गमवावा लागत आहे. अपघाताची ही मालिका रोखण्यासाठी महामार्गावरील वाहतूक थांबवण्यात यावी अशी मागणी विरोधी पक्षनेते विजय वडेट्टीवार यांनी सरकारकडे केली आहे. (Latest Marathi News)

"समृद्धीचे काम अर्धवट असताना एन्ड टू एन्ड सर्व सुविधा सुरू झाल्यानंतर हा रस्ता सुरू करण्याची गरज होती. त्या मार्गावर रेस्ट रूम नाही, समृद्धीत भ्रष्टाचारानेच झाला हे कोणी नाकारू शकत नाही. महामार्गाचे काम घाई गडबडीत करण्यात आले आहे. त्यामुळे निष्पाप लोकांचा बळी आज जात आहे. हे अपघात सरकारच्या घाईमुळे होत आहेत. यात तांत्रिक अडचणी आहेत. त्यामुळे समृद्धीची वाहतूक थांबवावी, समृद्धी सुरू ठेवायचा की नाही यावर विचार झाला पाहिजे. ", अशी मागणी वडेट्टीवारांनी केलीये.

शापित महामार्ग

शिवसेना ठाकरे गटाचे खासदार संजय राऊतांनी देखील महामार्गावरून टीकास्त्र सोडलंय. मुळात संपूर्ण महमार्ग चुकीच्या पद्धतीने निर्माण करण्यात आलाय. जनतेच्या सुरक्षेपेक्षा ठेकेदारांचं हित आणि कोट्यावधींचा मलीदा या पलिकडे सरकराने समृद्धी महामार्गाकडे पाहिलेलं नाही. शेतकरी, लहान उद्योजकांचे हित देखील पाहिले नाही. जमिनी ओरबाडून घेतल्या. त्यामुळे त्या सर्व व्यक्तींचे हे श्राप आहेत. महामार्ग घाईने पूर्ण करून त्याचं क्रेडीट तुम्ही घेतलं, तर आता होणाऱ्या अपघातांची जबाबदारी देखील सरकारने घेतली पाहिजे.

वेगमर्यादेचा विचार केला पाहिजे

समृद्धी महामार्गावर शनिवारी झालेल्या अपघावर मंत्री दीपक केसरकर यांनी म्हटलंय की, "Msrdc कडून अपघाताचा आढावा घेतला जातोय. यावर तोडगा काढला जाईल. आरोग्य सुविधांचा शासन गांभीर्याने विचार करत आहे. वेगमर्यदेचा विचार केला पाहिजे.