विधानपरिषदेत रीलस्टार्सनं पाजलं दिग्गजांना पाणी, विद्यमान आमदारांच्या विजयाचं गणित बिघडवलं

Nitesh Karale election result : विधान परिषदेच्या 5 जागांचा निकाल लवकरच जाहीर होणार आहे. या निवडणुकीत दिग्गजांची प्रतिष्ठा पणाला लागलेली असताना रीलस्टार्समुळे मताचं गणित बदललंय. होय... अपक्ष म्हणून निवडणुकीच्या रिंगणात उतरलेल्या रीलस्टार्सनी प्रस्थापितांना कसं पाणी पाजलंय?... पाहूयात या रिपोर्टमधून...

राज्यातली पदवीधर आणि शिक्षक मतदारसंघाची निवडणूक गाजली ती रीलस्टार्समुळे...या रीलस्टार्सनी निवडणुकीत मात्र दिग्गजांचा मूड ऑफ केला. नागपूर आणि छत्रपती संभाजीनगरमध्ये रीलस्टार्स किंग मेकरच्या भूमिकेत दिसले. नागपूर पदवीधर मतदारसंघाच्या निवडणुकीत कराळे मास्तरांनी प्रस्थापितांना धक्का दिलाय. शरद पवारांच्या राष्ट्रवादीनं उमेदवारी नाकारल्यानंतरही निवडणूक लढवण्यावर ठाम असलेले नितेश कराळे अपक्ष म्हणून मैदानात उतरले. इतकचं काय तर 25 हजारांहून अधिक मताधिक्यांनी तिसऱ्या क्रमांकावर आले.

दुसरीकडे, छत्रपती संभाजीनगर पदवीधर मतदारसंघात प्रस्थापित उमेदवारांपेक्षा जास्त चर्चा रंगली ती रीलस्टार रविराज साबळेंची... सरकारविरोधात टीकेचे आसूड ओढणाऱ्या रविराज साबळेंना सरकारनं अटकही केली होती. मात्र, मराठवाडा पदवीधर निवडणुकीच्या माध्यमातून रविराज साबळेंनी सरकारला थेट आव्हान दिलं. आणि फारसा प्रतिसाद मिळण्याची शक्यता नसताना साबळेंनी या निवडणुकीत चक्क गेम फिरवला. या निवडणुकीत रविराज साबळेंनी 20 हजारांहून अधिक मते मिळवली.

यावेळच्या पदवीधर निवडणुकीत अनेक रीलस्टार्सनी उमेदवारी दाखल केली. पुण्यात नामदेवराव जाधव, अरुणराज जाधव यांसारख्या सोशल मीडियावर हजारो फॉलोअर्स असणाऱ्या इन्फ्लुएंसरनी निवडणुकीच्या रिंगणात उतरण्याचा निर्णय घेतला. मात्र, नागपूरात कराळे मास्तरांमुळे काँग्रेसचे विद्यमान आमदार अभिजीत वंजारी थेट 'डेंजर झोन'मध्ये आले. तर मराठवाड्यात रविराज साबळेंच्या जोरदार मुसंडीमुळे सलग तीन टर्म आमदार असलेल्या सतीश चव्हाणांचं गणित बिघडलं. त्यामुळे निवडणुकीत विजय प्रस्थापितांचा झाला असला तरी खरी हवा केलीय़ ती रीलस्टार्स असणाऱ्या अपक्ष उमेदवारांचीच...

ब्युरो रिपोर्ट, साम टिव्ही