Crime News : दारु तस्करीसाठी समृद्धी महामार्गाचा वापर; वर्ध्यात कारसह लाखोंचा दारुसाठा जप्त

चेतन व्यास

वर्धा : दारूबंदी असलेल्या वर्धा जिल्ह्यात अवैध दारूची तस्करी करण्यासाठी दारुविक्रेते समृद्धी महामार्गाचा वापर करत आहेत. अमरावती जिल्ह्यातून दारुसाठा समृद्धीमहामार्गावरुन वर्ध्यात आणत असेलेल्या दारु तस्करांवर स्थानिक गुन्हे शाखेने सुसाट कारवाई सुरु केली आहे. स्थानिक गुन्हे शाखेच्या पोलिसांनी कारवाईकरिता समृद्धी महामार्गांवर सापळा रचला.

मात्र दारु तस्करांना याचा सुगावा लागताच त्याने पोलिसांच्या पथकाला जवळपास चार ते पाच तास मागे मागे फिरवले. अखेर गुन्हेगारांनी दारुने भरलेली कार सोडून पळ काढला. पोलिसांनी अमरावतीच्या विटाळ येथे शेतातील कच्च्या रस्त्यावरुन कारसह ९ लाख २६ हजारांचा विदेशी मद्यसाठा जप्त करत आरोपी कार चालक सोनू उर्फ योगेश विश्वकर्माविरुद्ध गुन्हा दाखल केला.

स्थानिक गुन्हे शाखेचे पथक रात्रगस्तीवर असताना अमरावती जिल्ह्यातून समृद्धी महामार्गावरुन दारुसाठा आणत असल्याची माहिती त्यांना मिळाली. पोलिसांनी सावंगी पोलिस ठाण्याच्या हद्दीत नाकाबंदी केली. मात्र आरोपींनी कार समृद्धी महामार्गवरून नागपूरच्या दिशेने फिरवली. पोलिसांनीही वाहनाचा पाठलाग सुरु केला. आरोपीने कार हळदगाव मार्गाने नेली. तेथून तो पवनार गावात आला आणि बायपास मार्गाने जुनापाणी चौकात आला, पोलिस त्याच्या मागावरच होते. (Latest News)

अखेर चालकाने समृद्धी महामार्गाने विटाळा शिवारात एका शेतातील कच्च्या रस्त्यावर कार उभी करुन पळ काढला. स्थानिक गुन्हे शाखेच्या पोलिसांनी कारची पाहणी केली असता कारमध्ये मोठ्या प्रमाणात देशी व विदेशी मद्यसाठा आढळून आला. कारसह एकूण ९ लाख २६ हजारांचा दारुसाठा जप्त करत आरोपीविरुद्ध सावंगी पोलिसात गुन्हा दाखल केला. ही कारवाई पोलिस अधीक्षक नुरुल हसन यांच्या मार्गदर्शनात पोलिस निरीक्षक संजय गायकवाड यांच्या निर्देशात पोलिस उपनिरीक्षक बालाजी लालपालवाले यांच्या नेतृत्वात करण्यात आली.