Urea Black Market: आर्वी, कारंजा तालुक्यात युरियाची साठेबाजी; १२ लाख रुपयांच्या युरिया बॅग जप्त, कृषी विभागाची कारवाई

चेतन व्यास, साम प्रतिनिधी

शेतकऱ्यांना वापराकरिता असलेल्या युरियाचा अनधिकृत साठा आर्वी आणि कारंजा तालुक्यात करण्यात आल्याची माहिती कृषी विभागाच्या अधिकाऱ्यांना मिळाली. या माहितीच्या आधारे कृषी विभागाने छापा टाकत तीन गोदामातून युरियाच्या १२ लाख ३५ हजार २०० रुपयांच्या ४ हजार ६३५ बॅग जप्त केल्या. शेतकऱ्यांकडून सध्याच्या काळात पिकांना युरिया देण्याकरिता मागणी होत आहे. अशात जिल्ह्यातील आर्वी आणि कारंजा तालुक्यात युरियाची साठेबाजी करत शेतकऱ्यांची आर्थिक लूट केली जातेय.

युरियाकरीता शेतकऱ्यांची फरवड होत असल्याची माहिती कृषी विभागाच्या अधिकाऱ्यांना मिळाली. त्यानंतर कारंजा तालुक्यातील राजणी आणि आर्वी तालुक्यातील बाजारवाडा आणि पिंपळखुटा येथील गोदामावर कृषी विभागाने छापा घातला. या तिन्ही गोदामातून ४ हजार ६३५ बॅग जप्त करण्यात आल्यात. या कारवाईत कृषी विभागाने जप्त केलेला मुद्देमाल पोलिसांच्या स्वाधीन करण्यात आल्याचे त्यांच्याकडून सांगण्यात आले आहे.

या बॅग शेतकऱ्यांना चढ्या दराने विकण्याकरिता जमा करून ठेवण्यात आल्या होत्या. का औद्यागिक वापराकरिता होत्या याचा खुलासा तपासणी अंती कळणार असल्याचे सांगण्यात आले आहे.दरम्यान छापेमारीची ही कारवाई मुख्य गुणवत्ता निरीक्षक प्रवीण देशमुख, जिल्हा परिषदेची कृषी विकास अधिकारी संजय बमनोटे, तंत्र अधिकारी चंद्रशेखर कोल्हे यांच्या पथकाने केलीय.

आर्वी आणि कारंजा या दोन तालुक्यात तीन गोदामात अनधिकृतरित्या साठवून ठेवण्यात आलेला युरिया कृषी विभागाकडून जप्त करण्यात आला आहे. त्याचे नमुने अमरावती येथील प्रयोगशाळेत पाठविण्यात आले आहे. तेथून अहवाल आल्यानंतर हा युरिया शेतकऱ्यांच्या वापराकरिता असलेला आहे की औद्योगिक वापराकरिता याचा खुलासा होणार असल्याचे कृषी विभागाकडून सांगण्यात आले आहे.