Uddhav Thackeray: उद्धव ठाकरेंची दिल्लीत मोदींवर टीका; महाराष्ट्रात रण पेटलं, भाजप नेता संतापला

बालाजी सुरवसे, धाराशीव

परराष्ट्र धोरण, अमेरिकेचा टॅरिफ बॉम्ब आणि पंतप्रधान नरेंद्र मोदींचा चीन दौरा यावरून शिवसेना (उबाठा) पक्षप्रमुख उद्धव ठाकरे यांनी तोफ डागल्यानंतर भाजपचे नेते चंद्रशेखर बावनकुळे यांनी सडेतोड प्रत्युत्तर दिलं. याशिवाय राजकीय सल्लाही दिला. जगाची आणि मोदींची तुलना करण्यापेक्षा उद्धव ठाकरेंनी आपला स्वतःचा पक्ष सांभाळावा, असा खोचक सल्ला बावनकुळेंनी दिला. ते धाराशीवमध्ये बोलत होते.

उद्धव ठाकरे हे दिल्ली दौऱ्यावर आहेत. तिथं ते वेगवेगळ्या पक्षांच्या नेत्यांच्या भेटी घेत आहेत. आज, गुरुवारी सकाळी ठाकरेंनी पत्रकार परिषद घेतली. या पत्रकार परिषदेत त्यांनी भारताचे परराष्ट्र धोरण, डोनाल्ड ट्रम्प यांनी भारतावर टाकलेला टॅरिफ बॉम्ब आणि पंतप्रधानांचा आगामी चीन दौरा यावरून टीकास्त्र डागलं. नरेंद्र मोदी हे जगभर फिरतात. मात्र, जगभरात आपल्या देशाचा एकही मित्र नाही, असा टोलाही उद्धव ठाकरेंनी लगावला. याबाबत धाराशीव दौऱ्यावर असलेले भाजप नेते आणि महसूल मंत्री चंद्रशेखर बावनकुळे यांना प्रसारमाध्यमांच्या प्रतिनिधींनी विचारलं असता, त्यांनी ठाकरेंविरोधात संताप व्यक्त केला.

उद्धव ठाकरे यांना दिसत नाही. त्यांना चष्म्याचा नंबर बदलावा लागेल किंवा चांगल्या हॉस्पिटलमध्ये ट्रीटमेंट घ्यावी लागेल, असे बावनकुळे म्हणाले. मोदींनी योग दिवस दिला. संपूर्ण देशाने स्वीकारला. जगानेही स्वीकारला. मोदींनी दहशतवादाच्या विरोधात लढाई उभारली. देश उभा राहिला. दहशतवादाविरोधात जग उभा राहिला. मोदींच्या पाठिशी संपूर्ण जग आहे, हे उद्धव ठाकरेंना दिसत नाही, असं बावनकुळे म्हणाले.

स्वतःचा पक्ष सांभाळा!

मोदींवर टीका करणाऱ्या उद्धव ठाकरेंविरोधात बावनकुळेंनी संताप व्यक्त करतानाच त्यांना राजकीय सल्ला दिला. जगाची आणि मोदींची तुलना करण्यापेक्षा उद्धव ठाकरेंनी आपला पक्ष सांभाळावा. तुमच्या पक्षातील लोक दररोज शिंदे यांच्या पक्षात जात आहेत हे उद्धव ठाकरेंना दिसत नाही. त्यांना चष्म्याचा नंबर बदलावा लागेल, असं ते म्हणाले.