समृद्धी महामार्गावर भीषण अपघात; भरधाव कारची ट्रकला धडक, कल्याणमधील दोघांचा जागीच मृत्यू

अभिजीत सोनवणे, साम टीव्ही

समृद्धी महामार्गावर पुन्हा एकदा भीषण अपघात घडला आहे. वाशिम जिल्ह्यानंतर आता नाशिकच्या सिन्नरमध्ये भीषण अपघाताची दुर्घटना घडली. या अपघातात दोन जणांचा मृत्यू झाल्याची माहिती मिळाली आहे. या अपघात प्रकरणी सिन्नर पोलिसांनी पुढील तपास सुरू केला आहे.

मिळालेल्या माहितीनुसार, नाशिकच्या सिन्नरला समृद्धी महामार्गावर भीषण अपघात घडलाय. टायर फुटल्यामुळे कार महामार्गावर उलटून ट्रकला धडकली. या अपघातात दोघेजण दगावले. तर अपघातात एकूण नऊ जण जखमी झाले.या कारमध्ये तीन प्रौढ आणि आठ लहान मुले असे एकूण 11 जण या गाडीतून प्रवास करत होते.

अपघातात प्रौढांमधील एक पुरुष तर एक महिला यामध्ये दगावले आहेत. सिन्नर तालुक्यातील फर्दापूर येथे विवाह सोहळ्यानिमित्त आलेल्या कल्याण येथील नातेवाईकांवर ही दुर्दैवी वेळ ओढवली आहे. सिन्नर तालुक्यातील पाटोळे शिवारात येणाऱ्या समृद्धी महामार्गावर हा भीषण अपघात घडला. यात गाडी पूर्णतः चक्काचूर झाली आहे. घटनेचा अधिक तपास सिन्नर पोलीस करत आहेत.

वाशिममध्ये अपघाताचा थरार

यवतमाळमधून देवदर्शनासाठी शिर्डीला जाणाऱ्या भाविकांच्या कारचा गुरुवारी भीषण अपघात झाल्याची घटना घडली. या अपघातात दोन भाविकांचा जागीच मृत्यू झाला. तर दोन जण जखमी झाले. ही अपघाताची घटना गुरुवारी रात्री 11 वाजताच्या सुमारास समृद्धी महामार्गावर वाशिम जिल्ह्यातील धनज पोलिस स्टेशन हद्दीत घडली.