यवतमाळ जिल्ह्यात शेतकऱ्यांवर दुबार पेरणी करण्याची वेळ

संजय राठोड

यवतमाळ: धोंडीधोंडी पाणी दे..!  मृगनक्षत्रात पावसाने दमदार हजेरी लावल्याने बळीराज्याने पेरण्या उरकल्या मात्र विदर्भात माॅन्सूनचा पत्ता नसुन आद्राच्या पावसानेसुध्दा दडी मारल्याने बळीराजा आसमानी संकटात सापडला आहे. त्यामुळे त्याच्यावर दुबार पेरणी करावी लागत आहे. शेतकऱ्यांच्या पोरांनी वरूण राजाला प्रसन्न करण्यासाठी धोंड्या काढून धोंडीधोंडी पाणी दे म्हणत दारोदार भटकंती सुरू केली आहे.

कमरीला कडूनिंबाच्या फांद्या हातात मुसळ व त्याच्या मधोमध भलेमोठे बेंडूक बांधून डफडीच्या तालावर नाचायचे आणी धोंडीधोंडी पाणी दे धोंडीचे दिवस पाणी मोठ हिवस धोंडी आली दारात अन पाऊस आला जोरात असे, लोकगीत म्हणून शेतकऱ्याची पोरं वरून राज्याला प्रसन्न करण्याची धडपड करीत आहेत. तर नागरिकही पाऊस येण्यासाठी धोंडीवर पाण्याचा वर्षाव करीत आहेत.

दरम्यान, महाराष्ट्रामध्ये सुरुवातीच्या टप्यात पावसाने जोरदार हजेरी लावली होती. परंतू गेली ८ दिवस झाले पावसाने पाठ फिरवल्याचं दिसत आहे. हवामान खात्याने यावर्षी 100 टक्के पावसाची शक्यता वर्तवली होती. परंतू आता पावसाने पाठ फिरवल्यामुळे शेतकरी संंकटात अडकला आहे.