Politics News: ठाकरेंच्या बालेकिल्ल्यात भाजपचा दे धक्का; तीन महत्वाच्या शिलेदारांचा जय महाराष्ट्र

विनायक वंजारे, साम टीव्ही

सर्वोच्च न्यायालयाने दिलेल्या आदेशानुसार स्थानिक स्वराज्य संस्थांच्या निवडणुका येत्या ४ महिन्यांत घेण्याचे निर्देश दिले आहेत. त्यानुसार लवकरच निवडणूक जाहीर होण्याची शक्यता आहे. त्यामुळे सर्वच पक्षांनी मोर्चेबांधणी सुरू केली असून सध्या फोडाफोडीचं राजकारण उफाळून आलंय. अशातच मालवणमधून ठाकरे गटाला मोठा धक्का बसणार असल्याची माहिती समोर आली आहे. ठाकरे गटाचे तीन महत्वाचे शिलेदार मशालची साथ सोडत भाजपात जाणार आहेत. आज त्यांचा मुंबईतील भाजप प्रदेश कार्यालयात पक्षप्रवेश सोहळा पार पडणार आहे.

मालवणचे तीन नगरसेवक यतीन खोत, मंदार केणी आणि दर्शना कासवकर हे आज अधिकृतपणे भारतीय जनता पक्षात प्रवेश करणार आहेत. आज सकाळी १० वाजता मुंबईतील भाजप प्रदेश कार्यालयात, प्रदेशाध्यक्ष रवींद्र चव्हाण यांच्या उपस्थितीत हा पक्षप्रवेश सोहळा पार पडणार आहे. या पक्षप्रवेशामुळे ठाकरे गटाला मोठं खिंडार पडणार असल्याचं बोललं जात आहे.

नगरसेवक मंदार केणी आणि यतीन खोत हे पूर्वी राणेंचे कट्टर समर्थक मानले जात होते. मंदार केणी हे मालवण तालुका प्रमुख म्हणून कार्यरत होते. जेव्हा नारायण राणेंनी काँग्रेस सोडून स्वाभिमान पक्षाची स्थापना केली, तेव्हा हे दोघेही त्यांच्या सोबत होते. मात्र २०१९ च्या विधानसभा निवडणुकीआधी स्वाभिमान पक्ष स्वाभिमान पक्ष भाजपासोबत विलीन झाला. त्यानंतर मंदार केणी आणि यतीन खोत यांनी राणेंना सोडचिठ्ठी देत शिवसेना ठाकरे गटात प्रवेश केला.

मात्र, आता तिन्ही नेते भाजपासोबत जाणार आहेत. काही महिन्यांपूर्वी या तिघांचा भाजपमध्ये प्रवेश ठरलेला होता, मात्र भाजपमधील अंतर्गत मतभेदांमुळे तो रखडला. आता रवींद्र चव्हाण यांची भाजप प्रदेशाध्यक्षपदी नियुक्ती झाल्यानंतर, हा प्रवेश सोहळा पार पडणार आहे. मंदार केणी, यतीन खोत, दर्शना कासवकर आणि भाई कासवकर यांचा मालवण शहरात चांगला जनसंपर्क आहे. त्यांच्या भाजपमध्ये प्रवेशामुळे आगामी मालवण नगरपरिषद निवडणुकीत भाजपला मोठा फायदा होईल, असा अंदाज आहे.

सध्या सिंधुदुर्गात शिवसेना आणि भाजपमध्ये मोठा भाऊ कोण? या मुद्द्यावर वर्चस्वाची लढाई सुरू आहे. हा वाद सुरू असतानाच या तीन बड्या नेत्यांचा प्रवेश भाजपच्या ताकदीत भर घालणारा ठरणार आहे, असे स्थानिक राजकीय वर्तुळात बोलले जात आहे.