Ballaleshwar Temple Pali : नाद करायचा नाय! पूजेचं साहित्य विकणाऱ्या मराठी व्यावसायिकचा दुकानात आलेल्या विदेशी पर्यटकांसोबत थाई भाषेतून संवाद; पर्यटक आवाक

अष्टविनायकांपैकी एक महत्त्वाचे तीर्थक्षेत्र असलेल्या पालीतील श्री बल्लाळेश्वराच्या दर्शनासाठी जगभरातून भाविक मोठ्या संख्येने येतात. यंदाही विशेष म्हणजे थायलंडमधून आलेल्या गणेशभक्तांच्या ग्रुपने मंदिरात हजेरी लावली. या दरम्यान स्थानिक व्यावसायिक मनोज मोरे यांनी या थाई भाविकांशी थाई भाषेत संवाद साधला आणि पाहणाऱ्यांना आश्चर्याचा धक्का बसला. थायलंडमधील पर्यटकांसाठी हे मोठे आश्चर्य ठरले, तर स्थानिक नागरिकांना मनोज मोरे यांची भाषेवरील पकड आणि आत्मविश्वास पाहून अभिमान वाटला.

मनोज मोरे यांनी सांगितले की ते मागील अनेक वर्षांपासून थाई भाषेचा अभ्यास करत आहेत. केवळ बोलणेच नव्हे तर वाचन-लेखनही ते सहज करू शकतात. त्यांनी थायलंडला अनेक वेळा भेटी दिल्या असून, तेथील संस्कृती, भाषा आणि परंपरा यांचा सखोल अभ्यास केला आहे. त्यामुळे थाई भाषेत संवाद साधताना त्यांना कोणतीही अडचण येत नाही. या संवादामुळे थायलंडमधील भक्तांना स्थानिक परंपरा, मंदिरातील विशेषता आणि भारताच्या संस्कृतीबद्दल प्रत्यक्षात अधिक जाणून घेण्याची संधी मिळाली.

या वर्षी "मास्टर बेस्ट" नावाच्या थायलंडमधील संघटनेच्या माध्यमातून जवळपास अडीचशे गणेशभक्त भारतात आले. हे भाविक दरवर्षी गणेशोत्सवात मुंबईत सहभागी होतात आणि अनंत चतुर्दशी संपल्यानंतर ते पालीला येऊन श्री बल्लाळेश्वराचे दर्शन घेतात. यावेळी मनोज मोरे यांनी त्यांच्यासोबत केलेल्या संवादामुळे या ग्रुपला दर्शनाचा अनुभव अधिक आनंददायी झाला.

समाजमाध्यमांवर मनोज मोरे यांच्या थाई भाषेत बोलतानाचे व्हिडिओ मोठ्या प्रमाणावर व्हायरल होत आहेत. अनेकांनी याबाबत आश्चर्य व्यक्त केले असून, मोरे यांचे मित्र-परिवार यांचाही अभिमान वाढला आहे. यामुळे पालीसारख्या छोट्या गावाला आंतरराष्ट्रीय स्तरावर ओळख मिळत असल्याचे स्थानिक नागरिकांचे मत आहे.

पर्यटन क्षेत्रालाही या घटनेचा फायदा होत असल्याचे दिसून येते. मनोज मोरे यांचे मित्र विक्रम सिंग हे थायलंडहून पर्यटकांचे ग्रुप भारतात आणतात. तसेच मोरे स्वतःदेखील भारतातून कमी किमतीत थायलंडमध्ये टूरचे आयोजन करतात. या माध्यमातून दोन्ही देशांतील सांस्कृतिक देवाणघेवाण आणि पर्यटन व्यवसायाला उभारी मिळत आहे.

मोरे यांनी सांगितले की, भारतातील नागरिकांनाही कमी खर्चात थायलंडसारख्या परदेशी ठिकाणी प्रवास करता यावा यासाठी ते सातत्याने प्रयत्नशील आहेत. शिवाय थाई भाषा शिकण्यासाठी आणि थायलंडबद्दल अधिक जाणून घेण्यासाठी ते स्वतः मार्गदर्शन करतात. त्यामुळे युवकांमध्ये परदेशी भाषा शिकण्याची उत्सुकता वाढेल आणि पर्यटन क्षेत्रात रोजगाराच्या संधी देखील निर्माण होतील.

पालीतील श्री बल्लाळेश्वर मंदिर हे अष्टविनायकांपैकी एकमेव असे मंदिर आहे जिथे गणेशाची मूर्ती 'बल्लाळेश्वर' या नावाने ओळखली जाते. दरवर्षी हजारो देशी-विदेशी भाविक येथे दर्शनासाठी येतात. अशा वेळी थायलंडमधून आलेल्या भक्तांना त्यांच्या भाषेत माहिती देऊन सहकार्य करणे ही खऱ्या अर्थाने एक अनोखी घटना ठरली आहे. यामुळे केवळ भक्तांचाच नव्हे, तर पाली व रायगड जिल्ह्यातील पर्यटनाचा दर्जाही उंचावला आहे.