Loksabha Election 2024: रविकांत तुपकरांनी लोकसभेसाठी शड्डू ठोकला, राजू शेट्टींकडून 'स्वाभिमानी'च्या सहा जागा जाहीर

- रणजीत माजगावकर

Kolhapur News :

आम्ही दोन वर्षांपूर्वीच महाविकास सरकार सोबतचे संबंध तोडले आहेत. आघाडी सरकारमधून बाहेर पडलो, तिथून पुढे निवडणुका स्वबळावर लढवायच्या असा निर्धार आम्ही केला आहे. आगामी काळातील लाेकसभा निवडणुकीत (lok sabha election) महाराष्ट्रातील सहा जागांवर स्वाभिमानीचे उमेदवार निवडणुक लढवतील असे निश्चित केल्याची माहिती स्वाभिमानी शेतकरी संघटनेचे नेते राजू शेट्टी (raju shetti) यांनी साम टीव्हीशी बाेलताना दिली. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

रविकांत तुपकर यांनी आज साम टीव्हीशी बाेलताना शेतकऱ्यांचा आणि तरुणांचा लोकसभा निवडणूक लढून दिल्लीला जावे असा दबाव असल्याचे सांगितले. यावर साम टीव्हीने आज स्वाभिमानी शेतकरी संघटनेचे नेते राजू शेट्टी यांचे मत जाणून घेतले.

राजू शेट्टी म्हणाले स्वाभिमानीने यंदा सहा जागांवर लोकसभा निवडणुक लढविण्याचा निर्धार केला आहे. त्यापैकी एक बुलढाणा आहे. रविकांत तुपकर यांनी संघटनेच्या माध्यमातून लोकसभेची निवडणूक लढवावी असेही शेट्टींनी नमूद केले.

ते म्हणाले अलीकडे ते संघटनेच्या कार्यक्रमाला येत नाहीत. त्यांनी जर संघटनेकडून निवडणूक लढवली तर आम्हांला आनंदच आहे असेही स्वाभिमानी शेतकरी संघटनेचे नेते राजू शेट्टी यांनी स्पष्ट केले. (Maharashtra News)

दरम्यान स्वाभिमानी यंदा बुलढाणा, हातकणंगले, परभणी, काेल्हापूर, सांगली, माढा या मतदारसंघात लाेकसभेसाठी उमेदवार उभे करेल. या जागांवर निवडणूक लढविण्याचे नियाेजन यापूर्वीच ठरले आहे असेही राजू शेट्टींनी सांगितले.

Edited By : Siddharth Latkar