नग्न केलं अन् काळंनिळं होईपर्यंत मारलं; हॉटेल मालकाचं मॅनेजरसोबत भयंकर कृत्य, सोलापूर हादरलं

मॅनेजरने केलेल्या एका चुकीमुळे हॉटेल मालकाने त्यांना नग्न करून मारहाण केलीये. लोखंडी पाईपने त्यांना काळंनिळं होईपर्यंत मारलं. या मारहाणीत हॉटेल मॅनेजर गंभीर जखमी झाले. या मारहाणीचा व्हिडिओही सोशल मीडियात व्हायरल होत आहे. ही संतापजनक घटना सोलापूर पुणे राष्ट्रीय महामार्गावरील टेंभुर्णी जवळील एका हॉटेलमध्ये घडली आहे. या घटनेनंतर परिसरात खळबळ उडाली आहे. धक्कादायक बाब म्हणजे अद्याप पोलीस ठाण्यात गुन्हा दाखल करण्यात आला नाही.

हा संतापजनक प्रकार टेंभुर्णी येथील हॉटेल ७७ ७७ मध्ये घडला आहे. हॉटेल मालक लखन माने यानं हॉटेल मॅनेजरला मारहाण केली. मॅनेजरच्या एका चुकीमुळे मालकाने सर्व स्टाफसमोर त्यांना मारहाण केली. नग्न करून मारहाण करण्यात आल्याचं व्हायरल व्हिडिओतून स्पष्ट होत आहे. दरम्यान, पोलिसांनी या प्रकरणी अद्याप कोणताही गुन्हा दाखल केलेला नाही. हॉटेल मालक अजूनही मोकाट आहे. हॉटेल मालकाला शिक्षा झाली पाहिजे, अशी मागणी स्थानिकांकडून होत आहे.

व्हायरल व्हिडिओबाबत मॅनेजर म्हणाले, 'दुपारपासून माझा व्हिडिओ व्हायरल होतोय. हा व्हिडिओ खरंतर वेगळ्या पद्धतीने मांडला गेला आहे. हा व्हिडिओ नेमका कुणी काढला? का काढला? हे अद्याप समोर आलेलं नाही. तुम्हाला मॅनेजर या घटनेबाबत अधिक माहिती देतील', असं हॉटेल मालक म्हणाला.

या घटनेबाबत मॅनेजरने सांगितलं की, 'गेल्या अनेक दिवसांपासून मी या हॉटेलमध्ये काम करतोय. ४-५ महिन्यांपूर्वी मी ड्रिंक केली होती. खरंतर मला काहीच सुचत नव्हतं. मला घरचं टेन्शन होतं. मी ड्रिंक करून आलो होतो. म्हणून मला दादांनी शिक्षा दिली होती. दादा फॅमिली मेंबरसारखे आहेत. दादांनी मला कायम मदत केली आहे. हॉटेलचं नाव तसेच दादांचं नाव खराब करण्यासाठी हा कुणीतरी कट रचला आहे', असं मॅनेजरने म्हटलं आहे. याचा व्हिडिओही समोर आला आहे.