Solapur : हुंडा दिला नाही म्हणून छळ केला, संधी साधून नवऱ्याने आणि सासूने केली नवविवाहितेची हत्या; सोलापूर हादरलं

Solapur Sonali Shinde Murder case News चार महिन्यांपूर्वी लग्न होऊन सासरी गेलेल्या सोनालीला कधी वाटलं ही नसेल ज्याघरी ती जातेय. त्याच घरचे तिचा जीव घेतील. सोनालीचा सारोळे गावातील प्रतीक शिंदेशी विवाह झाला होता. सुखी संसाराची स्वप्न उरी घेऊन सासरी गेलेल्या सोनालीला वाटलं नसेल की ज्या घराला आपलं म्हणणार आहे, त्याच घरातील व्यक्ती तिच्या जीवावर उठतील. ही धक्कादायक घटना घडली आहे, सोलापुरातील मोहोळ तालुक्यात.

लग्नात हुंडा मिळाला नाही म्हणून २२ वर्षीय विवाहिता सोनालीची गळा दाबून हत्या झाली. सारोळे गावातील प्रतीक शिंदेसोबत २२ वर्षीय सोनालीचा विवाह झाला होता. पैशाच्या कारणावरून पत्नी आणि सासूकडून सोनालीचा छळ केला जात होता, असा आरोप सोनालीच्या घरच्यांनी केला आहे. याप्रकरणी पती प्रतीक शिंदे, सासू भामाबाई उर्फ वंदना शिंदे यांच्याविरोधात मोहोळ पोलीस ठाण्यात गुन्हा दाखल करण्यात आला आहे.

चार महिन्यापूर्वी सोनाली हिचा विवाह प्रतीक शिंदे यांच्यासोबत लावण्यात आला होता. त्यावेळी सासरच्यांनी सोनालीच्या घरच्यांकडून हुंड्याची मागणी केली. त्यानंतरही सोनालीला लग्नानंतर पती आणि सासू यांनी 'लग्नाच्या वेळेस टीव्ही दिला नाही, माझा मानपान करून सोन्याची अंगठी घातली नाही. मी एक दोन आठवड्यात वाट बघेन , नाहीतर तुमची मुलगी परत आणून सोडेन' अशी धमकी दिली होती.

मात्र सोनालीच्या आई-वडिलांनी मुलीच्या काळजीपोटी गयावया करत,'आमची परिस्थिती गरीब आहे' असे सांगून वीस हजार रुपये दिले होते. १२ एप्रिल रोजी सोनालीचे वडील दत्तात्रय सुरवसे यांना पती प्रतीक याचा कॉल आला. त्यावेळेस कॉलवर बोलताना, 'रात्री आम्ही दोघे एकत्र झोपलो होतो, मात्र सोनाली पहाटे उठली नसल्यामुळे आम्ही तिला मोहोळ येथील ग्रामीण रुग्णालयात घेऊन जात आहोत' असे सांगितले. मोहोळ येथील ग्रामीण रुग्णालयातील डॉक्टरांनी सोनालीला मृत घोषित केले.

सोनालीच्या मृतदेहाचं शवविच्छेदन करण्यात आलं. पोस्टमार्टमचा अहवाल आल्यानंतर तिची गळा दाबून हत्या केल्याचे निष्पन्न झालं. याप्रकरणी पती आणि सासू यांना मोहोळ पोलिसांनी अटक केली आहे. पोलीस या घटनेचा सविस्तर तपास करत आहेत. या घटनेने परिसरात खळबळ उडाली असून सोनालीच्या कुटुंबियांवर दुःखाचा डोंगर कोसळला आहे.