Narayan Rane: ...म्हणून राणे लोटांगण घालत भाजपात गेले : दीपक केसरकर

- विनायक वंजारे

सिंधुदुर्ग : ज्या कुटुंबामुळे मुख्यमंत्री झालात त्यांच्या बद्दल बोलताना जिभ थोडी तरी चाचरली पाहिजे हाेती. खरं तर तुम्हांला साधं संसदेतही बोलता येत नाही अशी टीका केंद्रीय मंत्री नारायण राणे यांच्यावर माजी गृहमंत्री दीपक केसरकर (deepak kesarkar) यांनी केली. (narayan rane latest marathi news)

केसरकर म्हणाले राणेंना (narayan rane) संसदेत साधं बोलता येत नाही. कोकणातील (kokan) लोकप्रतिनिधींनी संसद गाजवली मात्र राणे साधं परफॉर्मन्स दाखवता आलेला नाही. सुशांत सिंग (sushant singh) प्रकरण हे सीबीआयकडे आहे. ती तुमचीच तपास यंत्रणा आहे. जो तपास केला तो सीबीआय (CBI) जाहीर का करत नाही असा प्रश्न केसरकरांनी उपस्थित केला आहे. ज्यांचा या प्रकरणाशी कोणताचं संबध नाही त्यांच्यावर आरोप करायचे बदनामी करायची असं सगळं सुरु असल्याचे त्यांनी नमूद केले.

संजय राऊत (sanjay raut) तुमच्याबद्दल बोलले होते का ?मग तुम्ही का बोलता, संसदेत तुम्हाला उत्तर देता येत नाही मग इथे येऊन का बोलता? किरीट सोमय्याच्या (kirit somaiya) पत्रकार परिषदेला पुष्टी देण्यासाठी तुम्ही पत्रकार परिषद घेता मग तुमच्यावर किरीट सोमय्यांनी त्यावेळेस केलेले आरोप खरे मानायचे का? तुम्ही त्यावेळेस सामोरे न जाता लोटांगण घालून भाजपात (bjp) गेलात अशी टीका केसरकरांनी राणेंवर केली.

सोमय्या कोणाबद्दल बोलले, राऊत कोणाबद्दल बोलले त्यात तुम्ही का उडी घेता असा प्रश्न दिपक केसरकर यांनी उपस्थित केला आहे. तुम्हाला बोलायचचं असेल तर संसदेत चांगला परफॉर्मन्स दाखवा असा टोला दीपक केसरकर यांनी राणेंना लगावला आहे.

Edited By : Siddharth Latkar