Sai Baba Temple: शिर्डीत साई भक्तांची फसवणूक! बनावट पावतीचा प्रकार उघडकीस; कर्मचाऱ्यावर गुन्हा दाखल

सचिन बनसोडे, प्रतिनिधी

Shirdi Sai Baba Temple News:

साईसंस्थानच्या देणगी कक्षात देणगीदारांनी दिलेल्या देणगीपोटी बनावट पावती देऊन एकाचवेळी साईसंस्थान आणि देणगीदारांची फसवणूक करण्याचा धक्कादायक प्रकार उघडकीस आला आहे. साईबाबा संस्थानची फसवणूक करणाऱ्या कर्मचाऱ्यावर शिर्डी पोलीस ठाण्यात गुन्हा दाखल करण्यात आला आहे.

याबाबत अधिक माहिती अशी की, काही दिवसांपूर्वी साईबाबा (Sai baba Sansthan) संस्थानला एक निनावी पत्र प्राप्त झाले होते. या पत्रात देणगी कक्षात कामावर असलेला एक कंत्राटी कर्मचारी देणगीदारांना दिलेल्या रकमेच्या दोन भाग करून पावत्या देतोय आणि त्यातील एक बनावट असते. बनावट पावतीची संस्थानाकडे नोंद होत नाही. त्या रकमेचा अपहार केला जातो, असे नमूद केले होते.

साईबाबा संस्थानने याबाबत चौकशी केली असता या प्रकरणात तथ्य असल्याचे समोर आले. देणगी कक्षात कंत्राटी कामावर असलेल्या दशरथ चासकर या कर्मचाऱ्याने अपहार केल्याचा प्रकार चौकशीत उघड झाला.

या प्रकरणी साईबाबा संस्थानचे प्रभारी लेखा अधिकारी कैलास खराडे यांच्या फिर्यादीवरून कंत्राटी कर्मचारी दशरथ चासकर याच्या विरोधात शिर्डी पोलीस ठाण्यात विविध कलमान्वये गुन्हा दाखल करण्यात आला आहे.

दरम्यान आरोपी कर्मचारी चासकर याने आतापर्यंत किती लोकांना बनावट पावत्या दिल्या? तसेच त्याला या गुन्ह्यात आणखी कुणाची साथ आहे का? याबात शिर्डी पोलीस अधिक तपास करत आहेत. (Latest Marathi News)