... तर आरक्षणाचा प्रश्न सुटणार, शरद पवारांनी दिले तामिळनाडूचे उदाहरण

Sharad Pawar Tamil Nadu example for Maratha reservation solution आरक्षणाच्या मागणीसाठी राज्यभरातील मराठे मुंबईत दाखल झाले आहेत. आरक्षण घेतल्याशिवाय मुंबई सोडणार नाही, गोळ्या घातल्या तरी चालतील, अशी भूमिका मनोज जरांगे पाटील यांनी स्पष्ट केली. उपसमितीचे शिष्टमंडळ आज मनोज जरांगे पाटील यांची भेट घेणार आहे. त्यामुळे तोडगा निघणार का? याची चर्चा सुरू आहे. ही चर्चा सुरू असतानाच शरद पवार यांची प्रतिक्रिया समोर आल आहे. अहिल्यानगरमध्ये एका कार्यक्रमात बोलताना शरद पवार यांनी मराठा आरक्षणाबाबत मोठं वक्तव्य केलेय. शरद पवार यांनी मराठा आरक्षणाचा चेंडू केंद्राकडे टोलावला आहे.

घटनेत बदल करण्याची भूमिका घेतली तर आरक्षणाचा प्रश्न सुटू शकतो. केंद्र सरकारने यामध्ये निर्णय घ्यावा लागेल. ७२ टक्के आरक्षण तामिळनाडूत होऊ शकतं तर घटनेत बदल करता येऊ शकतं. त्यामुळे घटनेत बदल करण्याची भूमिका घेतली तर आरक्षणाचा प्रश्न सुटू शकतो, असे म्हणत शरद पवार यांनी आरक्षणाचा चेंडू केंद्राकडे टोलावला आहे. अहिल्यानगरमधील कार्यक्रमात शरद पवार बोलत होते.

राज ठाकरेंचा एकनाथ शिंदेंना टोला -

मराठा आरक्षणासंदर्भातील सर्व प्रश्नांची उत्तरे एकनाथ शिंदेंच देऊ शकतात. ते आल्यानंतर त्यांना हा प्रश्न विचारा. मागील वेळी एकनाथ शिंदेंनी वाशीमध्ये जाऊन प्रश्न सोडवला होता, ते पुन्हा का आले, या प्रश्नाचे उत्तर एकनाथ शिंदेंच देऊ शकतात, असा टोला राज ठाकरेंनी लगावला.

आरक्षणाबाबत सरकार सकारात्मक - विखे

आरक्षणाबाबत मुख्यमंत्र्यांची भूमिका सकारात्मक आहे. आरक्षणाबाबत महायुती म्हणून आमची भूमिका एकच आहे. मराठा आरक्षण उपसमितीचे सदस्य जरांगेशी चर्चा करणार असल्याचे विखे पाटील यांनी सांगितले. मुख्यमंत्र्यांसोबत झालेल्या बैठकीत सर्व मुद्द्यांवर सविस्तर चर्चा झाली आहे. राजकारणापेक्षा आरक्षणाचा मुद्दा कसा सुटेल याकडे लक्ष असेल, असे विखे पाटील म्हणाले.