Nagpur Vidarbha rain Update News : मागील चार दिवसांपासून नागपूर आणि विदर्भात पावसाने धुमाकूळ घातला आहे. नागपूर, धुळे अन् भंडाऱ्यात धो धो पाऊस कोसळत आहे, त्यामुळे नद्यांना पूर आलाय. अनेक गावांचा संपर्क तुटला आहे. अतिवृष्टीमुळे धुळे अन् नागपूरमधील काही शाळांना सुट्ट्या देण्यात आल्या आहेत. मुख्यमंत्री देवेंद्र फडणवीस यांच्याकडून नागपूर-विदर्भातील पावसाच्या स्थितीचा आढावा घेतला जात आहे. एनडीआरएफ आणि एसडीआरएफ पथकांना सतर्क राहण्याच्या सूचना देण्यात आल्या आहेत. मागील पाच दिवसांपासून विदर्भात पावसाने धुमाकूळ घातलाय. आजही सकाळपासून विदर्भात पाऊस धो धो कोसळत आहे. गुरूवारी विदर्भात पावसाची स्थिती कशी असेल, कुठे पाऊस कोसळणार याबाबत जाणून घेणार आहोत?
चंद्रपूरमध्ये गुरुवारी मुसळधार ते अतिमुसळधार पावसाची शक्यता वर्तवण्यात आली आहे. विदर्भातील गडचिरोली, गोंदिया, नागपूर, भंडाऱ्यात यलो अलर्ट देण्यात आला आहे. विजांच्या कडकडाटासह गुरुवारी पावसाची शक्यता वर्तवण्यात आली आहे. अमरावती, वर्धा, अकोल्यात तुरळक ठिकाणी मुसळधार पावसाची शक्यता वर्तवण्यात आली आहे. दरम्यान, रायगड, नाशिक, पुण्यातील घाट माथ्यावर मुसळधार पावसाची शक्यता आहे, तिथे ऑरेंज अलर्ट देण्यात आला आहे. मुसळधार ते अतिमुसळधार पावसाची शक्यता वर्तवण्यात आली आहे.
राज्यात पुढील २४ तासात नाशिक घाट, पुणे घाट, रायगड, चंद्रपूर या परिसरात ऑरेंज अलर्ट देण्यात आला आहे. भंडारा जिल्ह्यातील वैनगंगा नदीने धोका पातळी ओलांडली असून CWC ने अलर्ट पाठववला आहे. जिल्हा अधिकारी भंडारा यांच्या मागणी नुसार SDRF - १ पथक सदर जिल्ह्यामध्ये नियुक्त करण्यात आले असून परिस्थिती नियंत्रणात आहे. गडचिरोली जिल्ह्यातील साखरा वडसा नदी इशारा पातळीवर, गडचिरोली जिल्ह्यातील गोसीखुर्द प्रकल्पातून ४.५६ लक्ष कुसेक, चीचडोह बॅरेज धरणातून ३.६६ लक्ष कुसेक एवढा विसर्ग करण्यात आला आहे. अतिवृष्टीमुळे सध्यस्थितीत NH ३५३-८ पाल नदी व गोविंदपूर नाला येथे तात्पुरता बंद करण्यात आला असून इतर १३ रस्ते तात्पुरते बंद करण्यात आले. वाहतूक पर्यायी मार्गाने वळवण्यात आली आहे. SDRF चे एक पथक पूर्वस्थापित असून जिल्हा प्रशासना बरोबर कार्यरत आहे. नागरीकांना सूचित करण्यात आले असून सर्व संबंधित यंत्रणा सक्रिय करण्यात आल्या आहेत. पूरग्रस्त मौजा सावंगी ४ कुटुंब, विशी तुकूम ७ कुटुंब, ता. देसाईगंज मौजा कोटगल बॅरेज १३२ मजूर, ता. गडिचरोली मौजा ठाणेगांव ७३ प्रवाशी, ता. आरमोरी यांना तात्पुरते स्थलांतरित आले आहे.
नागपूर शहर-जिल्ह्यातील पावसाच्या स्थितीचा मुख्यमंत्री देवेंद्र फडणवीस यांनी आज नागपूर जिल्हाधिकारी, नागपूर महापालिका आयुक्त आणि पोलिस आयुक्तांकडून आढावा घेतला. सद्या परिस्थिती नियंत्रणात आहे. तथापि कोणत्याही परिस्थितीला तोंड देण्यासाठी एनडीआरएफ आणि एसडीआरएफ चमू सज्ज ठेवण्यात आल्या आहेत. मुसळधार पावसाचा इशारा लक्षात घेता जिल्हा प्रशासनाने आज जिल्ह्यातील शाळांना सुटी जाहीर केली आहे. नागरिकांनी सुद्धा सुरक्षेची काळजी घ्यावी, असे आवाहन मुख्यमंत्री देवेंद्र फडणवीस यांनी केले आहे.
वर्धा जिल्ह्याच्या 54 मंडळपैकी पन्नास मंडळामध्ये अतिवृष्टी झाली. वर्धा जिल्ह्यात सरासरी 103.7 मिमी पावसाची नोंद झाली. मागील दोन ते तीन दिवसांपासून मुसळधार पाऊस कोसळत आहे. त्यामुळे नदी-नाले भरून वाहत आहे, परिणामी ३० रस्ते बंद करण्यात आले आहेत.
हिंगणघाट तालुक्यातील दहा रस्ते, देवळी तालुक्यातील पाच रस्ते, समुद्रपूर तालुक्यातील पाच रस्ते, आर्वी तालुक्यातील तीन रस्ते, वर्धा तालुक्यातील दोन रस्ते, कारंजा तालुक्यातील दोन तर आष्टी तालुक्यातील एक रस्ता बंद करण्यात आला आहे. बंद असलेल्या रस्त्यांच्या गावांचा संपर्क तुटलाय.
वैनगंगा नदीच्या पाणी पातळीत वाढ झाल्याने चंद्रपूर जिल्ह्यातील ब्रह्मपुरी तालुक्यातल्या अनेक नदी-नाले दुथडी भरून वाहत आहेत. संततधार पावसाचा सर्वाधिक फटका ब्रम्हपुरी आणि नागभीड तालुक्यांना बसला आहे. त्यातही ब्रम्हपुरी शहर आणि तालुक्यातील मोठा भाग वैनगंगा नदीच्या काठावर आल्याने पुराचा फटका इथे अधिक बसला. ब्रम्हपुरी तालुक्यातील मुडझा-गांगलवाडी आणि गांगलवाडी-आरमोरी मार्गावरील वाहतूक नाल्याला पूर आल्याने ठप्प झाली आहे. वैनगंगा नदीच्या पाणी पातळीत आणखी वाढ झाल्यास तालुक्यात पूरपरिस्थिती उद्भवू शकते. त्यामुळे जिल्हा आपत्ती व्यवस्थापनाची एक टीम ब्रह्मपुरीत दाखल झाली आहे.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.