Walmik Karad: वाल्मिक कराड कचाट्यात, जिल्हाधिकाऱ्यांनी उचलले मोठं पाऊल

विनोद जिरे, बीड

बीडच्या मस्साजोगचे सरपंच संतोष देशमुख हत्याकांड आणि खंडणी प्रकरणी अटकेत असलेल्या वाल्मिक कराडच्या अडचणी वाढत चालल्या आहेत. वाल्मिक कराडचा शस्त्र परवाना रद्द करण्यात आला आहे. बीडच्या जिल्हाधिकाऱ्यांनी ही कारवाई केली आहे. गुन्हेगारी पार्श्वभूमी असल्यामुळे जिल्हाधिकाऱ्यांनी हा निर्णय घेतला आहे.

मिळालेल्या माहितीनुसार, खंडणी प्रकरणातील आरोपी वाल्मिक कराडचा शस्त्र परवाना रद्द करण्यात आला आहे. गुन्हेगारी पार्श्वभूमी असल्यामुळे जिल्हाधिकारी यांनी जिल्ह्यातील १०० शस्त्र परवानाधारकांचे परवाने रद्द केले आहेत. यामध्ये वाल्मीक कराडचा देखील समावेश असून जिल्हाधिकाऱ्यांनी त्याचा शस्त्र परवाना रद्द करून टाकला आहे.

खंडणी प्रकरणातील आरोपी वाल्मिक कराडविरोधात १५ गुन्हे दाखल आहेत. तत्कालीन पोलिस अधीक्षक अविनाश बारगळ यांनी जिल्ह्यातील गुन्हेगारी पार्श्वभूमी असलेले २००५ शस्त्र परवान्याचा पुनर्विचार करावा असा अहवाल पाठवला होता. आता वाल्मिक कराडवर कारवाई करत जिल्हाधिकाऱ्यांनी त्याला दणका दिला आहे.