Sangli News : रिळेत 5 गव्यांचा संशयास्पदरित्या मृत्यू; विषबाधेचा अंदाज

Sangli Latest News : सांगलीच्या शिराळा तालुक्यातील रिळे येथील पाटील दरा नामक शिवारात गेल्या दोन दिवसांमध्ये पाच गवे संशयास्पदरित्या मृतावस्थेत आढळून आले. विषबाधा झाल्याने या गव्यांचा मृत्यू झाल्याचा प्राथमिक अंदाज व्यक्त केला आहे. तपासणी करून या गव्यांचे जागेवरच दहन करण्यात आले. (Latest Sangli News)

दरम्यान, रविवार पावलेवाडी खिंडीत वयोमानामुळे मृत झालेला गवा आढळला होता. दोन दिवसांत सहा गव्यांचे (Bison) मृतदेह आढळून आल्याने परिसरात एकच खळबळ उडाली आहे. काल (२० फेब्रुवारी) सायंकाळी ५ वाजण्याच्या सुमारास रिळे येथील वनविभागच्या लगत दोन नर व १ मादी असे तीन गवे संशयास्पदरित्या मृतावस्थेत आढळून आल्याची माहिती वनविभागास मिळाली.

घटनेची माहिती मिळताच वनविभागच्या पथकाने घटनास्थळी धाव घेतली. शोधाशोध केली असता परिसरात एकूण पाच गवे संशयितरित्या मृतावस्थेत आढळून आले. मृत गव्यांपैकी दोन गव्यांचे मृतदेह पूर्णपणे सडलेल्या अवस्थेत असल्याने त्यांची प्राथमिक तपासणी करून अहवाल तयार करण्यात आला. पशुवैद्यकीय अधिकारी अंबादास माडकर, शुभांगी अरगडे यांनी मृत झालेल्या सर्व गव्यांची उत्तरीय तपासणी केली असता या गव्यांचा मृत्यू झाल्याचे स्पष्ट झाले.