Sangli : सांगली कारागृहात राडा! १६ जणांकडून दोन कैद्यांवर जीवघेणा हल्ला, लाथाबुक्क्या अन् विटा डोक्यात घातल्या

विजय पाटील, सांगली

सांगलीतील कारागृहात दोन टोळ्यांमध्ये जोरदार राडा झाला असल्याची बातमी समोर आली आहे. दोन सराईत गुन्हेगारांना १६ जणांच्या टोळीने बेदम मारहाण केली. यावेळी विटांनी केलेल्या मारहाणीत दोघे जखमी झाले आहेत. कारागृहातील खुल्या मैदानात हा प्रकार घडल्याने एकाच गोंधळ उडाला होता. दरम्यान कारागृहातील कैद्यांच्या सुरक्षेवर प्रश्नचिन्ह निर्माण झाला आहे.

मिळालेल्या माहितीनुसार, जखमी गुंड पवन साळुंखे हा सराईत गुन्हेगार असून त्याच्यावर जिल्हाधिकार्‍यांनी एमपीडीए अंतर्गत कारवाई करून एक वर्षासाठी स्थानबद्ध केले आहे. तर त्याचा साथीदार मेघशाम उर्फ मोठ्या जाधव हा देखील सराईत गुन्हेगार आहे. त्यामुळे दोघांना बेगळ्या बरॅकमध्ये ठेवण्यात आले आहे.

दरम्यान, या दोघांचे कट्टर विरोधक असणारा आदित्य पवार याच्यासह १६ जण वेगवेगळ्या गुन्ह्यात सांगली कारागृहात वेगळ्या बरॅकमध्ये आहेत. दोन्ही टोळींना कारागृहातील खुल्या मैदानात आणण्यात आले होते. यावेळी दोन्ही टोळी समोरासमोर आले. १६ जणांच्या टोळीने गुंड पवन साळुंखे आणि मेघशाम उर्फ मोठ्या जाधव या दोघांना तुम्हाला वेगळ्या बरॅकमध्ये ठेवले आहे. म्हणून स्वत:ला शहाणे समजता का? असे म्हटले.

त्यामुळे दोन्ही टोळीत खटका उडाला. दोन्ही टोळीत जोरदार वादावादीचा प्रकार घडला. त्यानंतर गुन्हेगार आदित्य पवार याने या दोघांना मारा असे त्याच्या टोळीला सांगितले. यानंतर या दोघांनी पलायन करण्याचा प्रयत्न केला. मात्र १६ जणांनी त्यांचा पाठलाग करून विटांनी बेदम मारहाण केली. यामध्ये दोघे जखमी झालेत. या घटनेमुळे मात्र सांगली कारागृहात एकच गोंधळ उडाला होता. याबाबत सांगली शहर पोलिस अधिकचा तपास करीत आहेत.