Accident News : समृद्धी महामार्गावर भीषण अपघात! ट्रक आणि डिझेल टँकरच्या धडकेत एकाचा मृत्यू

सचिन बनसोडे, अहिल्यानगर

समृद्धी महामार्गावर मध्यरात्री पुन्हा एकदा भीषण अपघाताची घटना घडली आहे. अहिल्यानगर आणि नाशिक जिल्ह्याच्या सीमेवर असलेल्या चेनेज 532 जवळ एक ट्रक आणि डिझेल वाहतूक करणाऱ्या टँकरची जोरदार धडक झाली. या भीषण अपघातानंतर डिझेल टँकरने अचानक पेट घेतला. या आगीत टँकर चालकाचा होरपळून दुर्दैवी मृत्यू झाला असून ट्रक चालक गंभीर जखमी झाला आहे.

मिळालेल्या माहितीनुसार, सदर घटना ही कोपरगाव तालुक्यातील देर्डे आणि सिन्नर तालुक्यातील पाथरे दरम्यान घडली आहे. एक ट्रक आणि डिझेल वाहतूक करणाऱ्या टँकरची जोरदार धडक झाली. ज्यात टँकरमध्ये डिझेल असल्याने आगीने रौद्र रूप धारण केले होते, ज्यामुळे परिसरात मोठ्या स्फोटाचा धोका निर्माण झाला होता.

घटनेची माहिती मिळताच कोपरगाव नगरपरिषद, कोल्हे कारखान्याचे अग्निशमन दल आणि समृद्धी महामार्गाच्या रेस्क्यू पथकाने तातडीने धाव घेतली. अग्निशमन दलाच्या जवानांनी जिवाची बाजी लावून तासाभरात टँकरला लागलेली भिषण आगीवर नियंत्रण मिळवले. या अपघातामुळे महामार्गावरील वाहतूक सुमारे तासभर पूर्णपणे विस्कळीत झाली होती.

पोलिसांनी घटनास्थळी धाव घेत वाहतूक सुरळीत केली आहे. दरम्यान, टँकरमध्ये चालकाव्यतिरिक्त अजून कोणी होते का? याचा अधिक तपास सिन्नर तालुक्यातील वावी पोलीस करत आहेत. याघटनेने परिसरात तणावपूर्वक वातावरण निर्माण झाले होते.