Nagpur : समृद्धी महामार्गावर ४० प्रवासी १० तास खोळंबले, नेमकं काय घडलं? वाचा

माधव सावरगावे, नागपूर

नागपूरहून मुंबईकडे जाणारी संजय ट्रॅव्हल्सची खासगी बस समृद्धी महामार्गावर हर्सूल टोल नाक्याजवळ शनिवारी पहाटे दोन वाजेच्या सुमारास अचानक बंद पडली. त्यामुळे बसमधील ४० प्रवाशांचे मोठे हाल झाले. रात्रभर थंडीत कुडकुडत आणि भीतीच्या छायेत प्रवाशांना रस्त्यावरच थांबावे लागले. महिला प्रवाशांची विशेष कुचंबना झाली असून, प्रवाशांना पिण्याच्या पाण्याचीही व्यवस्था उपलब्ध नव्हती.

मिळालेल्या माहितीनुसार, नागपूरहून मुंबईकडे जाणारी संजय ट्रॅव्हल्सची खासगी बस (क्र. एमएच ४० सीटी- ४१७७) ही समृद्धी महामार्गावरील सावंगी टोलनाक्याच्या पुढे जावून बंदी पडली. चालकाने बस रस्त्याच्या कडेला आणून उभी करुन मालकाला माहिती दिली.

मात्र मालकाने दुसरी बस सध्या उपलब्ध नसल्याचे सांगीतले. जेव्हा उपलब्ध होईल तेव्हा बस येईल असे सांगून मालकाने फोन बंद करुन टाकला असे प्रवाशांनी सांगीतले. आता येईल, थोड्या वेळाने येईल असे करत पहाट झाली तरीही बस आलीच नाही. त्यामुळे प्रवाशी त्रस्त झाले होते. सकाळी घटनेची माहिती मिळताच प्रादेशिक परिवहन अधिकारी विजय काठोळे यांनी तातडीने भरारी पथक पाठवले.

मोटार वाहन निरीक्षक नम्रता शिंदे यांनी घटनास्थळी धाव घेत प्रवाशांसाठी तातडीने पाण्याच्या बाटल्या, चहा व नाश्ताची व्यवस्था केली. तसेच ट्रॅव्हल्स चालकाला पर्यायी बस तात्काळ उपलब्ध करून देण्याच्या सूचना देत कारवाईचा इशारा दिला. त्यानंतर मात्र घाबरलेल्या मालाकने दुपारी साडेबारा वाजता बस पाठवली. बस आल्यानंतर प्रवासी पुढील प्रवासासाठी रवाना झाले. जवळपास दहा तास अडकल्याने प्रवाशांत संताप व्यक्त होत होता.