Sambhajinagar : दोन जिवलग मित्रांचा करुण अंत; जनावरे चारताना तलावात पोहण्यासाठी उतरले असता बुडाले

छत्रपती संभाजीनगर : दहावीत शिकणारे दोन जिवलग मित्र सुटी असल्याने जनावरे चारण्यासाठी गेले होते. तलावाजवळ गेल्यानंतर दोघेजण पोहण्यासाठी पाण्यात उतरले. मात्र त्यांना पोहता येत नसल्याने दोघांचाही पाण्यात बुडून मृत्यू झाला. सदरची घटना छत्रपती संभाजीनगर जिल्ह्यातील खुलताबाद तालुक्यातील सोनखेडा परिसरात शनिवारी दुपारी तीन वाजता उघडकीस आली. 

संभाजीनगर जिल्ह्यातील घोडेगाव येथील रहिवासी असलेले आकाश रमेश गोरे (वय १६) व अनिकेत रमेश बनकर (वय १६) असे मयत झालेल्या दोघा मुलांची नावे आहेत. दरम्यान या प्रकरणी अधिक माहिती अशी की, आकाश आणि अनिकेत हे दोघे जिवलग मित्र आहेत. दोघे घोडेगाव येथील सद्गुरु जनेश्वर माध्यमिक विद्यालयात दहावीच्या वर्गात शिक्षण घेतात. शनिवारी दोघे शाळेतून घरी आल्यानंतर दुपारी दोन वाजेच्या सुमारास दोघे जनावरे चारण्यासाठी घराबाहेर पडले. 

गुरे चरणाऱ्या व्यक्ती आल्याने घटना उघड 

सोनखेडा परिसरातील पाझर तलावाजवळ पोहोचल्यानंतर दोघे तलावात पोहण्यासाठी उतरले. मात्र दोघांना पाण्याचा अंदाज आला नाही, शिवाय त्यांना पोहता येत नसल्याने ती दोघेही पाण्यात बुडाले. काही वेळानंतर तलावाजवळ गुरे चालणारा व्यक्ती आला. यावेळी त्याला तलावा शेजारी कपडे व चप्पल पडलेली आढळून आली. यावेळी काहीतरी अनुचित प्रकार घडल्याचं त्या व्यक्तीच्या लक्षात आलं. त्यानंतर तात्काळ त्याने ही माहिती ग्रामस्थांना दिली. 

एकुलता एक मुलगा गेला

घोडेगाव सोनखेडा येथील पट्टीच्या पोहणाऱ्याने तलावात उतरून दोघांचा शोध घेतला. अथक प्रयत्नानंतर दोघांचा मृतदेह पाण्यातून बाहेर काढण्यात आला. दोघांच्या कुटुंबाला माहिती मिळताच नातेवाईकांनी टाहो फोडला. दोन्ही कुटुंबावर दुःखाचा डोंगर कोसळला असून गावकऱ्यांनी हळहळ व्यक्त केली. या घटनेत तलावात बुडून मृत्यू झालेला अनिकेत बनकर याची आई पती पासून विभक्त राहते. गेल्या काही दिवसांपासून अनिकेत आई व बहिणीसह मामाच्या गावाला राहत होता. मात्र एकुलता एक मुलगा गेल्याने आईने टाहो फोडला.