Sambhajinagar Corporation : प्रारूप विकास आराखड्यावर ८ हजार ५०० आक्षेप; सुनावणीसाठी चार अधिकाऱ्यांची समिती

रामू ढाकणे 

छत्रपती संभाजीनगर : संभाजीनगर शहरासाठी नव्याने प्रारूप विकास आराखडा तयार करण्यात आला आहे. हा आराखडा तयार झाल्यानंतर यावर काही आक्षेप असल्यास तो नोंदविण्याचे आवाहन महापालिकेने केले होते. त्यानुसार आराखड्यावर ८ हजार ५०० आक्षेप नोंदविण्यात आले आहेत. (Sambhajinagar) घाईगडबडीने तयार केलेल्या या आराखड्यात अनेक भागावर चुकीच्या पद्धतीने आरक्षण टाकण्यात आल्याने हा गोंधळ उडाला आहे. 

छत्रपती संभाजी नगर शहराचा प्रारूप विकास आराखडा ३३ वर्षानंतर ७ मार्चला प्रसिद्ध करण्यात आला होता. महापालिकेकडून केवळ ३ महिन्यातच घाई गडबडीत शहराचा नवा प्रारूप आराखडा प्रसिद्ध केल्याने नागरिक चांगलेच हैराण झाले आहे. त्यात असंख्य आणि गंभीर चुका झाल्याचे निदर्शनास येत (development Plan) आहे. त्यानंतर नागरिकांना सूचना, हरकती घेण्यासाठी ६० दिवसांचा अवधी महापालिकेकडून देण्यात आला होता. 

४ अधिकाऱ्यांची समिती 

महापालिकेने दिलेल्या ६० दोवसांच्या मुदतीत ६ मे हा आक्षेप नोंदवण्याचा शेवटचा दिवस असल्याने नागरिकांनी रांगा लावून जवळपास ८ हजार ५०० आक्षेप दाखल केले आहेत. दरम्यान या आक्षेपांची छाननी मनपाकडून केली जाईल. त्यानंतर राज्य शासनाने नियुक्त केलेल्या ४ अधिकाऱ्यांच्या समितीमार्फत यावर सुनावणी केली जाणार आहे.