Sambhajinagar : बंटी बबलीच्या जोडीने घरमालकाला लुटलं! पोलिसांनी काही तासांत लावला छडा

छत्रपती संभाजीनगरमधून मोठी बातमी समोर आली आहे. भाडेकरू म्हणून राहणाऱ्या एका बंटी बबलीच्या जोडीने घर मालकाला लुटल्याची घटना घडली आहे. याप्रकरणी पोलिसांनी तपासाची चक्रे वेगाने फिरवत दोघांनाही बेड्या ठोकल्या आहेत. नवनीत मधुकर नाईक आणि स्मिता नवनीत नाईक असे या चोरट्यांची नावे आहेत. या दोघांनी मिळून पैशांसह, सोन्या - चांदीचे दागिने असा ६५ हजारांचा ऐवज चोरला असून दोघेही सराईत गुन्हेगार असल्याचं तपासात उघडं झाले आहे.

मिळालेल्या माहितीनुसार, छत्रपती संभाजीनगरच्या वाळूज पोलिसांच्या पथकाने घरात भाडेकरू म्हणून राहून चोरी करणाऱ्या सराईत 'बंटी–बबली' जोडीला अटक केली आहे. वाळूज गावातील रहिवासी गणेश वडगावकर यांच्या घरात ऑक्टोबर व नोव्हेंबर दरम्यान भाडेकरू म्हणून राहणारे नवनीत मधुकर नाईक आणि स्मिता नवनीत नाईक यांनी घरातून ५० हजार रुपये रोख व सोन्या,चांदीचे दागिने असा एकूण ६५ हजार रुपयांचा ऐवज चोरून नेल्याची तक्रार दाखल झाली होती.

या प्रकरणी वाळूज पोलीस ठाण्यात गुन्हा दाखल करण्यात आला होता. तपासादरम्यान आरोपी सराईत असून महाराष्ट्रातील विविध पोलीस ठाण्यांत त्यांच्यावर गुन्हे दाखल असल्याचे निष्पन्न झाले. उरण पोलीस स्टेशनच्या गुन्ह्यात अटक झाल्यानंतर वाळूज पोलिसांनी त्यांना तळोजा व कल्याण कारागृहातून ताब्यात घेतले. तपासात आरोपींकडून सुमारे ४० हजार रुपयांचा मुद्देमाल जप्त करण्यात आला असून पुढील तपास सुरू आहे.