अजितदादांचं विमान मुंबईहून बारामतीपर्यंत कसं पोहोचलं? पवारांनी सांगितली संपूर्ण टाइमलाइन....

उपमुख्यमंत्री अजित पवार यांच्या निधनानंतर विविध शंका आणि खळबळजनक दावे समोर येत होते. या पार्श्वभूमीवर दिवंगत अजित पवारांचे पुतणे आणि आमदार रोहित पवार यांनी पत्रकार परिषद घेऊन संपूर्ण घटनेची सविस्तर माहिती दिली. त्यांनी अजित पवार यांच्या मुंबई ते बारामती विमानप्रवासाचा संपूर्ण तपशील स्क्रीनवर दाखवत माहिती दिली. रोहित पवार यांनी सांगितलं की, अजित पवार सकाळी मुंबईहून बारामतीकडे रवाना झाले होते. मुंबई–बारामती हे सुमारे २१० किमी अंतर असून हा प्रवास अवघ्या २७ मिनिटांत पूर्ण होणार होता. संबंधित विमान ‘व्हीएसआर’ (VSR) कंपनीचं असून ते बंबार्डियर कंपनीने अमेरिकेत तयार केलेलं आहे. हे विमान २०१० साली बनवण्यात आलं असून अतिशय वेगवान असून तब्बल ५१ हजार फूट उंचीपर्यंत जाण्याची क्षमता आहे. अंदाजे अजित पवार डाव्या बाजूला बसले असावेत. बॅगा आणि सामान बाजूला ठेवण्यात येतं, तसेच त्या भागात इंधनाच्या टाक्या असण्याचीही शक्यता असते.

व्हीएसआर कंपनीबाबत बोलताना त्यांनी सांगितलं की, विजयकुमार सिंग आणि रिमी सिंग हे या कंपनीचे पार्टनर आहेत. रोहित सिंग आणि विजयकुमार सिंग हे व्हिस्ता सेल्स प्रायव्हेट लिमिटेडचे भागीदार असून, या कंपनीकडे लेअर जेट्सबाबत जवळपास मोनोपॉली आहे. सर्वाधिक विमाने ही व्हीएसआर कंपनीकडे असून त्यांनी स्वतःची ही कंपनी सुरू केली आहे. अपघाताच्या दिवसाची सविस्तर टाइमलाईनही रोहित पवारांनी सांगितली. सकाळी ७.०२ वाजता क्रू विमानाजवळ पोहोचले. कॅप्टनने आवश्यक तपासणी केली आणि एटीसीशी संवाद झाला.

मुंबई ते बारामती अजित दादांचा संपूर्ण प्रवासाचा टायमिंग

७.१० वाजता ‘ऑल ओके’ असल्याची माहिती देण्यात आली. यावेळी पीएसओ विदीप जाधवही तिथे उपस्थित होते. ७.५० वाजता सर्वजण विमानात पोहोचले. ७.५६ वाजता मुंबई एटीसीशी संपर्क साधण्यात आला आणि सकाळी ८ वाजून १० मिनिटे ५१ सेकंदांनी विमानाने टेक-ऑफ केलं. ८.२२ ला विमान लोणावळ्याजवळ होतं, ८.२५ ला पुण्याच्या हद्दीत, त्यानंतर यवत-सुपे-जळगाव परिसरात मार्गक्रमण सुरू होतं. मात्र ८.४३ ते ८.४५ दरम्यान ही दुर्दैवी घटना घडली.सकाळी ९ वाजता ‘दादा गंभीर जखमी आहेत, रुग्णालयात आहेत आणि जिवंत आहेत’ अशी बातमी कानावर आली होती. मात्र त्यानंतर दादांच्या निधनाची बातमी समजली आणि मन पूर्णपणे सुन्न झालं.