50 हजार फॉलोअर्स असलेली रिलस्टार निघाली चोर, बॉयफ्रेंडच्या मदतीने करायची महिलांच्या पर्स लंपास

सुशील थोरात, साम टीव्ही

अहिल्यानगर : रिलस्टार म्हणून सोशल मीडियावर प्रसिद्धीच्या झोतात असलेली एक तरुणी पैशांच्या मोहापायी बसमधील प्रवासी महिलांच्या पर्स चोरी करायची. अहिल्यानगरमधील या रिलस्टारने बॉयफ्रेंडच्या मदतीने अनेक ठिकाणी चोऱ्या केल्यात. या बंटी आणि बबलीची पोलखोल नगरच्या स्थानिक गुन्हे शाखेने केली आहे.

अहिल्यानगर जिल्ह्यात प्रवास करताना महिलांच्या पर्स चोरीचे प्रमाण जास्त वाढले होते. त्याकरता स्थानिक गुन्हे शाखेच्या पोलिसांनी या गुन्ह्यांबाबत छडा लावण्यासाठी शोध मोहीम सुरू केली होती. त्याचवेळी 19 नोव्हेंबर रोजी पाथर्डी बस स्थानकावरून एका महिलेची सोन्याचे दागिने असलेली पर्स चोरीला गेली. या प्रकरणी गुन्हा नोंद होताच पोलिसांनी पाथर्डी परिसरात लक्ष केंद्रित केले.

पोलिसांना मिळालेल्या माहितीनुसार, कोमल काळे ही 19 वर्षाची तरुणी रिलस्टार असून तिच्या प्रियकराच्या मदतीने पर्स चोरी करत असल्याची माहिती पोलिसांना मिळाली. त्यानंतर स्थानिक गुन्हे शाखेच्या पोलिसांनी कोमल काळे हिला पकडून अधिक माहिती घेतली. त्यावेळी तिचा पंचवीस वर्षीय प्रियकर सुजित राजेंद्र चौधरच्या मदतीने या चोऱ्या करत असल्याचे समोर आले आहे.

बंटी आणि बबलीकडून नवीनच बाजारात आलेला प्रो मॅक्स आयफोन, तसेच ओपो कंपनीचा महागडा फोन साडेसहा तोळे सोन्याचे दागिने असा जवळपास नऊ लाख 35 हजार रुपयांचा मुद्देमाल स्थानिक गुन्हे शाखेच्या पोलिसांनी जप्त केला आहे. त्यांनी यापूर्वी बसमधील प्रवाशांच्या पर्स चोरीच्या गुन्ह्यांची कबुली दिली आहे.

विशेष म्हणजे कोमल काळे हिच्या विरुद्ध बीड आणि अहिल्यानगर जिल्ह्यात यापूर्वी तीन गुन्हे नोंद आहेत. तर सुजित चौधरी याच्यावर दरोडा जबरी चोरी घघरफोडी अशा गंभीर स्वरूपाचे आठ गुन्हे विविध पोलीस ठाण्यात दाखल करण्यात आलेले आहेत.