बेपत्ता तरुणीचं गूढ उकललं; खंडाळ्यात खून अन् आंबा घाटात फेकलं, बॉयफ्रेंडनं गर्लफ्रेंडला संपवलं

रत्नागिरी तालुक्यातून एक धक्कादायक घटना समोर आली आहे. गेल्या काही दिवसांपासून बेपत्ता असलेल्या तरुणीच्या मृत्यूबाबत मोठी माहिती समोर आली आहे. प्रियकरानेच प्रेयसीची हत्या केली असल्याचं तपासातून उघड झालं आहे. पोलिसांनी आरोपीला ताब्यात घेतलं असून, पुढील तपास पोलिसांकडून सुरू आहे.

भक्ती जितेंद्र मयेकर असे मृत तरूणीचे नाव आहे. ती रत्नागिरी तालुक्यातील मिरजोळे गावातील रहिवासी होती. दुर्वास दर्शन पाटील असे आरोपीचे नाव आहे. पोलिसांनी दिलेल्या माहितीनुसार, आरोपीने आधी भक्तीला खंडाळा येथे नेले. आंबा घाटात आरोपीने भक्तीचा खून केला. नंतर मृतदेह निर्जन ठिकाणी टाकले.

पोलिसांना भक्ती बेपत्ता झाल्याची तक्रार प्राप्त होताच तपासाला सुरूवात केली. पोलिसांनी शनिवारी सायंकाळी मोठ्या प्रयत्नानंतर तिचा मृतदेह शोधून काढला. या प्रकरणी पोलिसांनी तपास करीत आरोपींचा शोध घेतला. या प्रकरणात प्रियकर दुर्वास दर्शन पाटील याच्यासह विश्वास विजय पवार आणि सुशांत शांताराम नरळकर या दोघांना देखील संशयित म्हणून पोलिसांनी ताब्यात घेतलं आहे.

हे तिघेही रत्नागिरी तालुक्यातील खंडाळा गावातील रहिवासी असल्याची माहिती आहे. दरम्यान, या प्रकरणानंतर परिसरात खळबळ उडाली असून, प्रेमप्रकरणातून तरूणीचा मृत्यू झाल्यामुळे कुटुंबावर दुखा:चा डोंगर कोसळला आहे. या प्रकरणी पोलिसांकडून अधिक तपास सुरू आहे.