Bribe Case : कोकणात खळबळ! महसूल अधिकाऱ्याला लाच घेताना रंगेहाथ पकडलं, असा अडकला जाळ्यात

कोकणातील चिपळूण तालुक्यातील महसूल विभागातील एका अधिकाऱ्याने लाच स्वीकारल्याची घटना समोर आली आहे. सातबारा उताऱ्यात फेरफार करण्याच्या कामासाठी १० हजार रुपयांची लाच स्वीकारल्याची माहिती आहे. उमेश राजेशिर्के असे या अधिकाऱ्याचे नाव असून त्याला रत्नागिरी लाचलुचपत प्रतिबंधक विभागाच्या पथकाने रंगेहाथ पकडले आहे. या घटनेने सरकारी कामांवर प्रश्नचिन्ह उपस्थित केले जात आहेत.

मिळालेल्या माहितीनुसार, तक्रारदाराच्या सातबारा उताऱ्यात फेरफार करण्याचे काम संबंधित महसूल विभागाकडे होते. हे काम करून देण्यासाठी मंडळ अधिकारी उमेश राजेशिर्के याने तक्रारदाराकडे १० हजार रुपयांच्या लाचेची मागणी केल्याचा आरोप आहे. या मागणीमुळे तक्रारदाराने याबाबत रत्नागिरी लाचलुचपत प्रतिबंधक विभागाकडे (ACB) तक्रार दाखल केली.

तक्रार मिळाल्यानंतर ACB ने तक्रारीची सत्यता जाणून घेण्यासाठी तपास केला. या तपासादरम्यान लाचेची मागणी झाल्याचे समोर आले. यानंतर राजेशिर्के याच्यावर कारवाई करण्यासाठी विभागाने सापळा रचला. ठरल्याप्रमाणे तक्रारदाराच्या कारमध्ये मंडळ अधिकारी उमेश राजेशिर्के आला. यावेळी त्याने तक्रारदाराकडून १० हजार रुपयांची रोख रक्कम स्वीकारली. लाचेची रक्कम स्वीकारताच दबा धरून बसलेल्या लाचलुचपत प्रतिबंधक विभागाच्या पथकाने राजेशिर्केला रंगेहाथ पकडले. या कारवाईमुळे महसूल विभागात खळबळ उडाली आहे.

दरम्यान, या प्रकरणी चिपळूण पोलीस ठाण्यात गुन्हा दाखल करण्याची प्रक्रिया सुरू होती. लाचलुचपत प्रतिबंधक विभागाकडून पुढील कायदेशीर कारवाई करण्यात येत आहे. महसूल विभागाशी संबंधित कामांसाठी नागरिकांकडून लाचेची मागणी होत असल्यास त्यांनी थेट लाचलुचपत प्रतिबंधक विभागाशी संपर्क साधावा, असे आवाहन करण्यात आले आहे. नागरिकांच्या शासकीय कामांसाठी लाच मागणाऱ्या अधिकारी किंवा कर्मचाऱ्यांविरोधात तक्रार करण्याचे आवाहनही विभागाकडून करण्यात येते.