...तरच भाजप राज्यसभेसाठी ५ वा उमेदवार देणार, शरद पवारांसोबत कनेक्शन; देवेंद्र फडणवीसांचा मास्टरप्लान काय?

Summary -

• राज्यसभा निवडणुकीसाठी दोन्ही आघाड्यांची ‘वेट अँड वॉच’ भूमिका

• शरद पवार यांच्या उमेदवारीवर महाविकास आघाडीत एकमत नाही

• शरद पवार उमेदवार नसतील तर भाजप पाचवा उमेदवार देणार

• देवेंद्र फडणवीस यांच्या रणनीतीमुळे राजकीय वर्तुळात चर्चांना उधाण

गणेश कवडे, मुंबई

राज्यसभेच्या निवडणुकीसाठी अर्ज भरण्यास आता अवघा एक दिवस शिल्लक राहिला आहे असं असतानाही दोन्ही आघाड्यांमध्ये 'वेट अँड वॉच'ची भूमिका कायम आहे. महाविकास आघाडीत शरद पवारांच्या उमेदवारीवरून अद्याप एकमत होऊ शकले नाही. तर दुसरीकडे भाजपने सावध पवित्रा घेतला आहे. शरद पवार उमेदवार नसतील तर भाजप आपला पाचवा उमेदवार रिंगणात उतरवण्याची शक्यता आहे. या राजकीय खेळीमुळे राज्याच्या राजकारणात मोठी खळबळ उडाली आहे.

राज्यसभेबाबत दोन्ही आघाड्यांची वेट अँड वॉचची भूमिका आहे. राज्यसभेसाठी उमेदवारांचा अर्ज दाखल करण्यास एक दिवस शिल्लक राहिला असला तरी उमेदवारी यादी प्रलंबित आहेत. शरद पवारांना उमेदवारी देण्यावरून महाविकास आघाडीत एकमत होत नसल्याने अद्यापही घोषणा करण्यात आली नाही. राज्यसभेच्या एकमेव जागेवर शिवसेना, काँग्रेससह राष्ट्रवादी काँग्रेस शरद पवार गटाने दावा केला आहे. या एका उमेदवारीमुळे तिन्ही पक्षांमध्ये रस्सीखेच सुरू आहे. राज्यसभेतील विरोधी पक्षनेतेपदाचा हवाला देत काँग्रेसकडून दावा कायम आहे तर शिवसेनेचाही राज्यसभेसाठी आग्रह आहे.

तर दुसरीकडे महाविकास आघाडीच्या भूमिकेवर भाजप नवा डाव टाकण्याची शक्यता आहे. शरद पवारांना उमेदवारी दिली नाही तर भाजप पाचवा उमेदवार उतरवण्याच्या तयारीत आहेत. शरद पवार उमेदवार नसल्यास भाजपचे ५ तर शिवसेना आणि राष्ट्रवादी काँग्रेसचा प्रत्येकी एक उमेदवार राज्यसभा लढणार असल्याची माहिती सूत्रांनी दिली आहे.

दरम्यान, राज्यसभेसाठी भाजपकडून चार नव्या चेहऱ्यांना संधी देण्यात आल्याची माहिती समोर आली आहे. नव्या चेहऱ्यांमध्ये एका महिलेचा देखील सहभाग असणार आहे. रामदास आठवले यांना देखील उमेदवारी मिळण्याची शक्यता कमीच दिसत आहे. आज राज्यसभेसाठी भाजप उमेदवारांची यादी जाहीर करणार आहे.