Pune News : धर, धर, धर...; धुलीवंदनला पुणे वाहतूक पोलिसांचा दणका, बेशिस्त अन् तळीरामांवर मोठी कारवाई

पुणे : राज्यात गुन्हेगारीचं प्रमाण प्रचंड प्रमाणात वाढत चाललं आहे. त्यामुळे पोलीस प्रशासन अलर्ट मोडवर आलंय. त्यातल्या त्यात हेच गुन्हेगारीचं प्रमाण पुण्यात चांगलंच वाढलं आहे. काल धुलीवंदनच्या पार्श्वभूमीवर पुणे शहर वाहतूक शाखेकडून मोठी कारवाई करण्यात आली आहे. पुणे शहर वाहतूक शाखेकडून होळी आणि धुलीवंदन साजरा करताना पुणेकरांनी सुरक्षा तथा शांतता अबाधित राखण्याच्या उद्देशाने केलेल्या विशेष मोहिमेअंतर्गत ही कारवाई करण्यात आली आहे.

पुणे वाहतूक पोलिसांनी शहरात ८ हजार ५५२ वाहनांची तपासणी केली. मद्यपान करून वाहन चालवणाऱ्या ४०२ तळीरामांवर ड्रंक अँड ड्राईव्हची कारवाई करण्यात आली. शहरातील बेशिस्त वाहन चालकांना लगाम घालण्यासाठी स्पेशल ड्रायव्हिंग अंतर्गत शहरात ९० ठिकाणी नाकांबदी लावण्यात आली होती.

शहरात ३७ वाहतूक विभाग आणि संबंधित पोलीस स्टेशनकडून लावण्यात आलेल्या नाकाबंदीमध्ये वाहतूक नियमांचं उल्लंघन करणाऱ्या बेशिस्त वाहन चालकावर कारवाई करण्यात आली आहे. यामध्ये ट्रिपल सीट,राँग साईड, ड्रंक अँड ड्राईव्ह अशांवर कारवाई करत तब्बल ३८६ वाहनं जप्त करण्यात आलेत. एकूण ६ हजार ११८ केसेस करण्यात आल्या असून ५० लाख ९४ हजार रुपयांची दंडात्मक कारवाई करण्यात आली आहे.