Pune-Solapur Flight: अवघ्या ४० मिनिटात सोलापूरहून गाठा पुणे; कधीपासून सुरू होणार विमानसेवा?

सचिन जाधव, साम टीव्ही प्रतिनिधी

पुणे विमानतळावरुन तीन शहरांसाठी विमानसेवा सुरू होणार आहे. येत्या महाराष्ट्र दिनापासून म्हणजेच १ मे पासून पुणे- सोलापूर विमानसेवा सुरू होणार आहे. सोलापूर, मंगळुरु आणि बागडोगरा या शहरांशी पुण्याची पहिल्यांदाच हवाई जोडणी केली जाणार आहे. वाढत्या प्रवाशांच्या संख्येमुळे ही विमानसेवा वाढवण्याचा निर्णय घेण्यात आलेला आहे. त्यामुळे पुणे विमानतळावरुन आता एकूण १५ नवीन उड्डाणांना परवानगी देण्यात आली आहे. यामुळे ये-जा करणाऱ्या विमानांची संख्या आता २२० वरुन २३५ झालेली आहे. यामुळे प्रवाशांना अधिक पर्याय उपलब्ध होतील.

पुणे ते सोलापूर प्रवास करणाऱ्यांसाठी ही विमान सेवा महत्त्वाची ठरणार आहे. जी स्टार एअर कंपनीकडून दिली जाणार आहे. यात आता पुण्याहून सोलापूरला अवघ्या ४० ते ४५ मिनिटांत पोहतचा येणार आहे. पुणे आंतरराष्ट्रीय विमानतळाला मंजूर झालेल्या अतिरिक्त १५ स्लॉट्सचा वापर एक मेपासून सुरू केला जाणार आहे. पुण्याहून मंगळुरू, सोलापूर आणि बागडोगरा या नव्या मागाँवर उड्डाणे सुरू होणार आहेत. त्याशिवाय,काही मार्गावर विमानसेवेत वाढ होणार आहे.

पुणे विमानतळाचा उन्हाळी हंगाम जाहीर करताना १ मेपासून नवीन स्लॉटचा वापर केला जाणार असल्याचे जाहीर केले होते. नवीन स्लॉटला मंजुरी मिळाल्याने एकूण स्लॉट्सची संख्या २२०वरून २३५वर पोहोचली आहे. या स्लॉटचा वापर करून विमानतळ प्रशासने मंगळुरू, सोलापूर, बागडोगरा ही शहरे पुण्यासोबत थेट जोडली आहेत दररोज विमानसेवा असणार आहे.

पुणे - सोलापूर - पुणे फ्लाईट क्रमांक एस ५-३११ /३३२ असा असेल. विमान पुण्याहून ४५ मिनिटांत पुण्याहून सोलापूरला पोहोचेल. या सेवेमुळे पश्चिम महाराष्ट्रातील दोन शहरं विमान सेवेने जोडले जाणार आहेत. पुणे ते सोलापूर या दोन महानगरांसाठी ही सातही दिवस सेवा उपलब्ध आहे. सोमवार ते शुक्रवार या काळात सोलापूरहून दुपारी अडीचच्या सुमारास विमानाचे उड्डाण होईल.

हे विमान पुण्यात ४० ते ४५ मिनिटांनी म्हणजे ३ वाजून २० मिनिटांनी पुण्यात पोहोचेल. त्यानंतर पुण्याहून हे विमान दुपारी चार वाजता सोलापूरला जाण्यासाठी उड्डाण घेईल. साधारण ४ वाजून ५० मिनिटांनी विमान सोलापुराला पोहोचेल. शनिवारी विमानसेवेच्या वेळेत काही बदल असेल. हे विमान ४ वाजून २० मिनिटांनी विमान पुण्यात दाखल होईल. त्यानंतर सोलापूरला जाण्यासाठी हे विमान पुण्याहून ४ वाजून ४० मिनिटांनी उड्डाण भरेल.