Beed News: 'तुझा मुलगा आमच्या ताब्यात, ५ लाख दे नाहीतर..' बीडमध्ये सिनेस्टाईल मुलाचे अपहरण

बीड शहरातून एक धक्कदायक बातमी समोर येत आहे. दिवसाढवळ्या एका नऊ वर्षाच्या शाळकरी मुलाचे अपहरण करण्यात आले आहे. पाच लाख रूपयांच्या खंडणीसाठी मुलाचे अपहरण करण्यात आल्याची प्राथमिक माहिती आहे. पोलिसांना याची माहिती मिळाल्यानंतर त्यांनी अवघ्या दीड तासात अपहरणकर्त्याला ताब्यात घेऊन मुलाची सुटका केली आहे. तसेच आरोपीच्या मुसक्या आवळल्या आहेत. या प्रकरणानंतर पोलीस कर्मचाऱ्याचे पोलीस अधीक्षक नवनीत कॉवत यांनी कौतुक केले आहे..

नऊ वर्षांचा मुलगा हा बीड शहरातील पांगरी रोड भागातील रहिवासी आहे. तर, जगदीश गायकवाड असे आरोपीचे नाव आहे. त्याने शाळकरी मुलाचे अपहरण करून मुलांच्या वडिलांना फोन केला. 'तुझा मुलगा आमच्या ताब्यात', असे सांगत त्याला ५ लाखांची खंडणीही मागितली. यानंतर कुटुंब घाबरले.

मुलाच्या कुटुंबाने तातडीने पोलीस शिवाजीनगर पोलीस ठाण्यात धाव घेतली. तसेच आरोपीविरोधात तक्रार दाखल केली. पोलिसांनी तातडीने आरोपीचा शोध घेण्यास सुरूवात केली. पोलिसांच्या सतर्कतेमुळे पुढील अनर्थ टळला.

अवघ्या दीड तासात पोलिसांनी अपहरणकर्त्याला ताब्यात घेऊन मुलाची सुटका केली. तसेच मुलाला तातडीने त्याच्या कुटुंबाच्या स्वाधीन केलं. त्यानंतर पोलिसांनी आरोपीच्या मुसक्या आवळत त्याला अटक केली.

यानंतर कुटुंबाने सुटकेचा निश्वास सोडला. स्थानिक गुन्हे शाखेच्या कर्मचाऱ्यांनी दाखवलेल्या तत्परतेचे सर्वत्र कौतुक होत आहे. या घटनेनंतर पोलीस अधीक्षक नवनीत कॉवत यांनीही त्यांचे कौतुक केले आहे.