Pandharpur News : पंढरपुरात शरदचंद्र पवार पक्षाचा उमेदवार असेल तरच प्रचार; काँग्रेसच्या पदाधिकाऱ्याचे वक्तव्य

पंढरपूर : पंढरपूरमध्ये काँग्रेस आणि राष्ट्रवादी काँग्रेसचे शरदचंद्र पवार पक्षांमध्ये उमेदवारीवरून घमासान सुरू आहे. याठिकाणी महाविकास आघाडीतील शरद पवार गट व काँग्रेस अशा दोन्ही पक्षांचे उमेदवार रिंगणात आहेत. दरम्यान काँग्रेस जिल्हाध्यक्ष नंदकुमार पवार यांनी उमेदवारीबाबत मोठे वक्तव्य केले आहे.

लोकसभेला शरदचंद्र पवार पक्षाने आघाडीचा धर्म पाळला आहे. त्यामुळे आता (Pandharpur News) पंढरपूरमध्ये राष्ट्रवादी काँग्रेस शरदचंद्र पवार पक्षाचा उमेदवार असेल, तर आम्ही त्यांचा प्रचार करून महाविकास आघाडीचा धर्म पाळू; असे विधान (Congress) काँग्रेसचे जिल्हाध्यक्ष नंदकुमार पवार यांनी केले आहे.

पंढरपूर विधानसभा मतदारसंघात राष्ट्रवादी काँग्रेस शरदचंद्र पवार पक्षाने अनिल सावंत यांना उमेदवारी दिली आहे. तर काँग्रेसने भगीरथ भालके यांना उमेदवारी दिली आहे. अनिल सावंत हे उमेदवार राहिले; तर काँग्रेस महाविकास आघाडीचा घटक पक्ष म्हणून आपला धर्म पाळेल; असे वक्तव्य केले आहे. त्यामुळे अनिल सावंत यांची उमेदवारी कायम राहील असे संकेत महाविकास आघाडीमध्ये दिले जात आहेत.