Heavy Rain : नोव्हेंबरमध्ये अतिवृष्टी, पुलावरून पाणी, वाहतूक ठप्प; सांगलीतील वाळव्यासह परिसराला झोडपून काढले

सांगली : सांगलीच्या वाळवा तालुक्यामध्ये पहाटेच्या सुमारास अतिवृष्टी झाली आहे. धुव्वाधार पाऊस झाल्यामुळे परिसरामध्ये पूरजन्य परिस्थिती निर्माण झाली आहे. ऐन दिवाळीच्या दिवशी जोरदार पाऊस आल्याने नागरिकांची चांगलीच तारांबळ उडाली आहे. तर शेतातील कापूस देखील खराब होण्याची शक्यता निर्माण झाली आहे.

राज्यात काही भागात अवकाळी पावसाची शक्यता वर्तविण्यात आली होती. दरम्यान दहा दिवसांपूर्वीच परतीच्या पावसाने (Heavy Rain) राज्यातील अनेक भागात हाहाकार माजविला होता. या पावसामुळे शेतीचे प्रचंड नुकसान झाले होते. काही दिवस पाऊस गेल्यानंतर आज पुन्हा सांगलीच्या वाळवा परिसरात जोरदार पाऊस झाला. (Sangli) वादळी वाऱ्यासह झालेल्या मुसळधार अशा पावसामुळे वाळवा परिसरातील ओढ्या-नाल्यांना पूर स्थिती निर्माण झाली आहे. 

सकाळी आलेल्या पावसामुळे आष्टा- वाळवा रस्त्यावरील छोटा पूल पाण्याखाली गेल्याने या मार्गावरील वाहतूक सकाळपासून बंद होती. त्यामुळे या मार्गावरील वाहतूक ठप्प झाली होती. तर सांगली जिल्ह्याच्या अनेक भागात देखील रात्री आणि पहाटेच्या सुमारास मुसळधार असा पाऊस पडला आहे. ऐन दिवाळीच्या दिवशी जोरदार पाऊस आल्याने नागरिकांची चांगलीच तारांबळ उडाली.