Rasta Roko Aandolan : जव्हार- मोखाडा- नाशिक महामार्गावर चक्का जाम; पेसा भरतीसंदर्भात आंदोलकांना पाठींबा

फैय्याज शेख 

पालघर : नाशिक येथे सुरू असलेल्या पेसा भरती संदर्भातील आंदोलकांना पाठिंबा देण्यासाठी आज पालघर जिल्ह्यात बंदची हाक देण्यात आली आहे. या बंदमध्ये सहभाग घेत ठीक ठिकाणी रास्ता रोको आंदोलनला सुरुवात झाली आहे. दरम्यान जव्हार- मोखाडा- नाशिक महामार्गावर चक्काजाम आंदोलन करण्यात आले. 

सरकारने पेसा भरती लवकरात लवकर सुरू करावी, राज्य पेसा कक्षात किमान ५० टक्के आदिवासी कर्मचाऱ्यांची नियुक्ती करण्यात यावी. तसेच ग्रामपंचायतीत पेसाचा पैसा कुठे खर्च केला यांची चौकशी करावी. नवीन पेसा गावांची निर्मिती गतिमान करावी, या सारख्या अनेक मागण्यासाठी आज चक्का जाम (Rasta Roko) आंदोलन सुरू करण्यात आले आहे.

आंदोलकांनी बसही आडविल्या 

पालघर (Palghar) जिल्ह्यातील जव्हार, मोखाडा, वाडा तालुक्यात चक्का जाम आंदोलन सुरू करण्यात आले असून आंदोलनकर्त्यांनी जव्हार व मोखाडा तालुक्यातील डाहाणू - जव्हार- मोखाडा- नाशिक (Nashik) महामार्गावर चक्का जाम आंदोलनला सुरवात केली आहे. मोखाडा तालुक्यातील बिरसा मुंडा चौक तर जव्हार बसस्थानकातील बस देखील अडवण्यात आल्या आहेत.