Palghar Earthquake: मध्यरात्री पालघर भूकंपाने हादरले! तासाभरात भूकंपाचे दोन धक्के, नागरिकांमध्ये भीतीचे वातावरण

फय्याज शेख, साम टीव्ही प्रतिनिधी

Jawhar Vikramgad earthquake latest news : पालघर जिल्ह्यातील जव्हार आणि विक्रमगड तालुका परिसरात रात्रीच्या वेळी भूकंपाचे सलग दोन सौम्य धक्के बसल्याने नागरिकांमध्ये प्रचंड घबराट पसरली आहे. अवघ्या एका तासाच्या अंतराने हे दोन्ही धक्के जाणवल्याची नोंद कऱण्यात आली आहे. पहिला धक्का ३.२ तर दुसरा धक्का ३.४ रिश्टर स्केल तीव्रतेचा नोंदवला गेला आहे.

मिळालेल्या माहितीनुसार, रात्रीच्या सुमारास २ तालुक्यात अचानक जमीन हादरल्याचा आणि गूढ आवाज आल्याचा अनुभव स्थानिकांना आला. भूकंपाची तीव्रता सौम्य असली तरी एकापाठोपाठ एक अशा दोन हादऱ्यांमुळे भयभीत झालेले नागरिक घराबाहेर पडले.

काही दिवसांपूर्वीच जव्हार तालुक्यात अशाच प्रकारे भूकंपाचे धक्के जाणवले होते. त्या घटनेची भीती ताजी असतानाच आता पुन्हा एकदा दोन धक्के बसल्याने परिसरातील ग्रामस्थांमध्ये चिंतेचे वातावरण निर्माण झाले आहे.

या भूकंपाच्या धक्क्यांमुळे कोणत्याही प्रकारची जीवित किंवा मोठी वित्तहानी झाल्याचे वृत्त नाही; मात्र प्रशासनाकडून परिस्थितीवर लक्ष ठेवले जात आहे. वारंवार होणाऱ्या या भूकंपाच्या हालचालींमुळे स्थानिकांमध्ये भीतीचे सावट असून प्रशासनाने नागरिकांना सतर्क राहण्याचे आणि घाबरून न जाता आवश्यक खबरदारी घेण्याचे आवाहन केले आहे.