Palghar Crime: शिवसेना पदाधिकारी अपहरण प्रकरणात मोठा ट्विस्ट; गुजरातमधील दगड खदानीत सापडलेली कार धोडींची?

रुपेश पाटील, साम प्रतिनिधी

शिंदे गट शिवसेनेचे संघटक अशोक धोडी यांच्या अपहरण प्रकरणात मोठी अपडेट समोर आलीय. पदाधिकारी धोडी यांचे अपहरण होऊन त्यांची हत्या झाली असावा असा संशय पोलिसांना आहे. अशोक धोडी हे गेल्या १२ दिवसांपासून बेपत्ता आहेत. आज एक कार पोलिसांना सापडलीय. ही कार धोडी यांची असल्याचा संशय पालघर पोलिसांना आहे. पुढील तपास करण्यासाठी पोलीस घटनास्थळी दाखल झाले आहेत.

शिवसेनेचे पदाधिकारी अशोक धोडी हे गेल्या १२ दिवसांपासून बेपत्ता आहेत. धोडी याचे अपहरण होऊन त्यांचा घातपात झाला असावा, असा पालघर पोलिसांना संशय आहे. अशोक धोडी यांच्या शोधार्थ पोलिसांनी आठ पथक तयार केली आहेत. वेगवेगळ्या ठिकाणी या तुकड्या तैनात करण्यात आली आहेत. आज पोलिसांना धोडी अपहरण प्रकरणी नवी माहिती मिळालीय. अपहरण प्रकरणी पालघर पोलिसांनी युद्ध पातळीवर कारवाई करत आहे.

पोलिसांनी सीसीटीव्ही कॅमेऱ्यांच्या आधारे धोडी यांचा शोध घेण्याचा प्रयत्न केला. मात्र अजूनही पोलिसांना बेपत्ता असलेल्या अशोक धोडी यांच्याबद्दल फारशी माहिती मिळाली नाहीये. मात्र आज पालघर पोलिसांना एका दगड खदानीत कार सापडलीय. गुजरातमधील सारेगम येथील माला फलिया येथील एका बंद पडलेल्या दगड खदानीमध्ये लाल रंगाची ब्रिजा कार सापडलीय. ही कार धोडी यांची असल्याचा पोलिसांना संशय आहे.

दरम्यान २० रोजी सायंकाळी सहाच्या सुमारास धोडी यांचं अपहरण करण्यात आलं होतं. यानंतर त्यांची गाडी गुजरातच्या दिशेनं गेल्याचं एका सीसीटीव्ही दिसून आलं होतं. गुजरातमध्यील बंद पडलेल्या दगड खाणीत कार सापडल्यानंतर पालघर पोलीस तपासासाठी गुजरातमधील दगड खदानीवर पोहोचले आहेत. पालघरचे पोलीस अधीक्षक बाळासाहेब पाटील स्वतः घटनास्थळी दाखल झाले आहेत. काहीच वेळात अशोक धोडी यांची गाडी पाण्यातून बाहेर काढली जाणार आहे.

अशोक धोडी यांचा घातपात झाल्यास गाडीतच मृतदेह असण्याची शक्यता पोलिसांनी वर्तवलीय. मिळालेल्या माहितीनुसार, धोडी यांचे २० जानेवारीला अपहरण झाले होते. त्या दिवशी अशोक धोडी यांनी आपल्या पत्नीला फोन केला होता. आपण डहाणूवरून घरी येत असल्याचं त्यांनी आपल्या पत्नीला सांगितलं होतं. मात्र त्यानंतर त्यांचा फोन बंद झाला. याप्रकरणी माहिती देताना पोलीस म्हणाले की, डहाणूहून निघाल्यानंतर धोडी यांची गाडी रस्त्यातील एका घाटामध्ये अडवण्यात आली होती. त्या ठिकाणी गाडीच्या काचेचे अवशेष त्याचबरोबर काही खाणाखुणा सापडल्या होत्या.

याप्रकरणी अशोक धोडी यांच्या ब्रिझाकारसह एक आयशर टेम्पो आणि एका पिकपचाही वापर करण्यात आला अशी माहितीही पोलिसांनी दिलीय. आज बाराव्या दिवशी पोलिसांना अपहरण प्रकरणी एक लीड मिळालीय. दरम्यान पोलिसांना पाच आरोपींनी धोडी यांचं अपहरण केल्याचा संशय आहे. हे पाचही आरोपी फरार असून यातील दोन आरोपी हे राजस्थानला पळून गेल्याची माहिती समोर येत आहे.