IAS अधिकारी झालात मग तुम्ही सरकार चालविण्याचा ठेका घेतला का? गडकरींकडून कर्मचाऱ्यांची कानउघडणी

पराग ढोबळे, साम प्रतिनिधी

नागपूर: IAS अधिकारी स्वतःला सगळ्या विषयाचे ज्ञानी समजून सरकार स्वतः चालवत असल्याचा आव आणतात, असे खडेबोल नितीन गडकरींनी सुनावलेत. ते जैन समाजातील उद्योजकांचा महाकुंभ कार्यक्रमात बोलत होते.

नागपूरात तीन दिवसीय जैन समाजातील उद्योजकांचा महाकुंभ कार्यक्रमाच आयोजन करण्यात आले आहे. त्याप्रसंगी बोलतांना गडकरी यांनी नागपूर महानगर पालिकेच्या कर्मचाऱ्यांची कान उघडणी केली. 'आमचे IAS अधिकाऱ्यांना मी मस्करीत म्हणतो, तुम्ही सगळ्याच विषयाचे ज्ञानी आहेत. मंत्री लोकांना तुम्ही काय समजता, आम्ही अंगुठा छाप आहोत? तुम्ही IAS अधिकारी असल्याने तुम्ही सरकार चालविण्याचा ठेका घेतला आहे का? प्रॉब्लेम आहे की कोणी एक विषयात तज्ञ असू शकतो १० विषयांचा नसतो, असं गडकरी म्हणाले.

यावेळी नितीन गडकरी यांनी एका कंत्राटदारासोबत झालेल्या चर्चेचा किस्सा सांगितला. हाफिज नामक काँट्रॅक्टरला नागपूर महानगर पालिकेचा बनवून त्याला सांगितलं की, नागपूर महानगर पालिकेत इतक्या नालायक माणसांसोबत काम करण्याच तुला प्रशिक्षण दिलं. मुर्दाड सिस्टमसोबत काम करण्याचा प्रशिक्षण दिलं. तू जगाच्या कुठल्याही कोपऱ्यात जाऊन यशस्वी काम करू शकतो, अस म्हणत अधिकाऱ्यांना सुनावलं.

आपली स्पर्धा चायनासोबत आहे. चायना आपल्यापेक्षा १५ वर्ष पुढे आहे. आपल्याला पुढील पाच वर्षात चायनासोबत स्पर्धा करणे शक्य आहे, हे कठीण नाही. जपानला मागे टाकून आता ऑटोमोबाईल इंडस्ट्री जगात तिसऱ्या नंबरवर आहोत. लवकरच पहिल्या क्रमांकावर जाऊ. परवानगी घेण्यासाठी पण अनेक अडचणींनाचा सामना करावा लागतो, परंतु मला त्यावर बोलायचं नसल्याचं गडकरी म्हणालेत.

सरकारी कर्मचारी परवानगी मिळविण्यासाठी वर्ष घालवतात त्याचा परिणाम प्रकल्प किंमत वाढण्यावर होतो. ज्याला कॉन्ट्रॅक्ट दिले त्यालाच इतर परवानगी आणायला आदेश मी संचालकांना दिले. ते म्हणाले कसं शक्य आहे, कंत्राटदार चहा पाणी पाजेल, रात्री जेवण भोजन देईल, १५ दिवसांत परवानगी आणेल काही गोष्टी मनाला पटतात काही पटत नाही, असं गडकरी म्हणालेत.