Maratha Reservation : राणे कुटुंबावर हात टाकण्याची भाषा केली तर...; जरांगेंनी भावावर टीका केल्यानंतर निलेश राणे संतापले

मनोज जरांगे पाटील यांनी मराठा आरक्षणाच्या मागणीवरून सत्ताधाऱ्यांवर निशाणा साधण्यास सुरुवात केली आहे. मनोज जरांगे पाटील यांनी मंत्री नितेश राणे यांच्यावरही जोरदार टीका केली. मनोज जरांगेंच्या टीकेनंतर शिंदे गटाचे आमदार निलेश राणे कुटुंबासाठी धावून आले आहेत. निलेश राणे यांनी फेसबुक पोस्ट करत वैयक्तिक टीका न करण्याचा सल्ला जरांगे पाटील यांना दिला.

मनोज जरांगे पाटील हे गेल्या ४ दिवसांपासून आझाद मैदानात उपोषणाला बसले आहेत. मनोज जरांगे यांच्या आंदोलनाने राजकीय वातावरण तापलं आहे. मनोज जरांगेंवर नितेश राणे यांनी हिंदूमध्ये फूट पाडल्याचा आरोप केला. तसेच राणेंनी आंदोलनाला रोहित पवार रसद पुरवत असल्याचा आरोप केला.

नितेश राणे यांच्या आरोपांना मनोज जरांगे यांनी जोरदार प्रत्युत्तर दिलं. मनोज जरांगे यांनी आरोपांना उत्तर देताना चिचुंद्री म्हणत मंत्री नितेश राणेंवर टीका केली. नितेश राणे यांच्यावरील जहाल टीका केल्यानंतर निलेश राणे यांनी म्हटलं की, 'नितेश राणे एखाद्या विषयावर बोलल्यानंतर त्यावर तुम्ही टीका करा. पण वैयक्तिक टीका नको'.

'नितेश काही टोकाचे बोलला नाही किंवा वैयक्तिक बोलला नाही. कुठल्याही धमकीला राणे कुटुंब कधीच घाबरत नाही. तुम्ही जसे मरायला तयार असता, तसेच आम्ही राणे पण असतो. मनोज जरांगे पाटील तुमचं आणि माझं संबंध नेहमी आपुलकीचे राहिले, कौटुंबिक राहिलेत, ते तसेच राहिले पाहिजे. मी आजपर्यंत नातं जपलं. पुढेही जपेन आपल्याकडून पण तीच अपेक्षा आहे, अशा प्रकारची पोस्ट आमदार निलेश राणे यांनी फेसबुक पेजवरून पोस्ट केली आहे.