Supriya Sule: राष्ट्रवादी काँग्रेसची सध्याची परिस्थिती नेमकी कशी आहे? सुप्रिया सुळेंनी पुन्हा स्पष्ट भूमिका मांडली

Supriya Sule On NCP Split:

राष्ट्रवादी काँग्रेस पक्षांमध्ये फूट पडली नाही, असा पुनरुच्चार आज, शुक्रवारी सुप्रिया सुळे यांनी केला. त्या पुण्यात बोलत होत्या. स्थापनेपासून राष्ट्रवादी काँग्रेस पक्षाचे अध्यक्ष शरद पवार आहेत आणि सध्याचे राज्याचे प्रदेशाध्यक्ष जयंत पाटील आहेत, असंही त्यांनी स्पष्ट केले. (Latest Marathi News)

पक्षातील पडलेल्या फुटीबाबत बोलताना त्यांनी म्हटलं की, "स्थापनेपासून राष्ट्रवादी काँग्रेस पक्षाचे अध्यक्ष शरद पवार आणि राज्याचे प्रदेशाध्यक्ष जयंत पाटील आहेत. आमच्या पक्षाचे ९ आमदार आणि २ खासदारांनी वेगळी भूमिका घेतलीये. त्यांना यावर नोटीस पाठवली असून त्यांच्या उत्तराची आम्ही वाट पाहत आहोत, असं सुप्रिया सुळेंनी म्हटलं.

अजित पवारांचं नेतृत्व मान्य आहे का?

अजित पवारांचे नेतृत्व आपल्याला मान्य आहे की नाही या प्रश्नावर बोलताना सुप्रिया सुळेंनी म्हटलं की, "अजित पवारांचं नेतृत्व संपूर्ण महाराष्ट्रालाच मान्य आहे. सगळ्या पक्षांमध्ये अनेक चांगले नेते असतात. प्रत्येकामध्ये चांगले गुण असतात. आम्ही अटलबिहारी वाजपेयींचं नेतृत्व मान्य केलं, एनडी पाटलांचंही मान्य केलं. त्यामुळं असंख्य नेते विविध पक्षांमध्ये असतात. त्यामुळं त्यांच्यातील नेतृत्व त्यांच्यातील चांगले गुण हे समाजाला मान्यच असतात."

शरद पवारांचं देखील आज अजित पवारांविषयी मोठं वक्तव्य चर्चेत आलं होतं. मात्रनंतर आपण असं बोललोच नाही असंही शरद पवारांनी स्पष्ट केलं. तसेच राष्ट्रवादीमध्ये फूट पडली नसून त्यांची भूमिका पक्षविरोधी असल्याचे सांगत अजित पवार यांना पुन्हा संधी नसल्याचे मोठे विधानही पवारांनी केले आहे.