Maharashtra Political News: राष्ट्रवादी पक्ष शरद पवारांनी स्थापन केलाय, तर अजित पवार...'; राज्यातील राजकीय घडामोडीवर आमदार सरोज अहिरे स्पष्टच बोलल्या

Nashik News: राज्यातील राजकीय घडमोडींना वेग आला आहे. या सर्व राजकीय घडामोडीमुळे राजकीय वातावरण चांगलंच तापलं आहे. राष्ट्रवादी काँग्रेसचे नेते आणि विरोधी पक्षनेते अजित पवार भाजपसोबत जाणार असल्याच्या चर्चांनी जोर धरला आहे. याचदरम्यान, राज्यातील राजकीय घडामोडीवर आमदार सरोज अहिरे यांनी मोठं वक्तव्य केलं आहे. (Latest Marathi News)

आमदार सरोज अहिरे म्हणाल्या, 'राज्यातील राजकीय घडामोडीच्या बातम्या माध्यमातून येत आहेत. राष्ट्रवादी पक्ष शरद पवार यांनी स्थापन केला आहे. शरद पवार यांच्यानंतर दोन नंबरचे स्थान अजित पवार यांना आहे. पक्षाचे प्रमुख म्हणून शरद पवार यांना मी मानते. त्यामुळे शरद पवार यांच्या मान्यतेनुसार माझा निर्णय असेल'.

'मतदारसंघात मोठा निधी प्राप्त झाल्याने अजित पवार यांच्याबद्दल आदर आहे. आमदार नितीन पवार यांनी जी भूमिका व्यक्त केली, ती त्यांची वैयक्तिक भूमिका आहे. आम्ही पक्षाच्या सोबत आहोत, अशी प्रतिक्रिया देवळाली मतदारसंघाच्या राष्ट्रवादी काँग्रेसच्या आमदार सरोज आहिरे यांनी दिली.

दरम्यान, राष्ट्रवादी काँग्रेसचे नेते अजित पवार भाजपमध्ये (BJP) प्रवेश करणार असल्याच्या चर्चा सध्या सुरु आहेत. या चर्चांमुळे राज्यातील राजकीय घडामोडींना वेग आला आहे. अशामध्ये अजित पवार यांनी या चर्चांवर साम टीव्हीला प्रतिक्रिया दिली आहे. 'नव्या ‌राजकीय समीकरणांच्या फक्त चर्चा, त्यात काहीच तथ्य नाही', असे अजित पवार यांनी स्पष्टपणे सांगितले आहे.