NCP MLA Disqualification: राष्ट्रवादी काँग्रेस आमदार अपात्रतेची आज सुनावणी; विधानसभा अध्यक्षांचा निर्णय बदलणार का? सुप्रीम कोर्टाच्या भूमिकेकडे सर्वांचं लक्ष

दिल्ली, ता. २९ जुलै २०२४

राष्ट्रवादी काँग्रेस आमदार अपात्रता प्रकरणी सर्वोच्च न्यायालयात आज सुनावणी होत आहे. विधानसभा अध्यक्ष राहुल नार्वेकर यांनी दिलेल्या निकालाविरोधात सर्वोच्च न्यायालयात सुनावणी पार पडत आहे. आजच्या सुनावणीत कोर्ट काय निर्देश देणार? हे पाहणे महत्वाचे ठरणार आहे.

याबाबत सविस्तर माहिती अशी की, राष्ट्रवादी काँग्रेस पक्ष आमदार अपात्रता प्रकरणी आज सर्वोच्च न्यायालयामध्ये सुनावणी पार पडणार आहे. विधानसभा अध्यक्ष राहुल नार्वेकर यांनी दिलेल्या निकालाविरोधात शरद पवार यांच्या पक्षाच्या वतीने जयंत पाटील यांनी याचिका दाखल केली होती. यावर आज सर्वोच्च न्यायालयात सुनावणी होईल.

अजित पवार यांच्यासोबत गेलेल्या आमदारांना विधानसभा अध्यक्ष राहुल नार्वेकर यांनी अपात्र करायला पाहिजे अशी मागणी या याचिकेतून करण्यात आली आहे. न्यायमूर्ती जे बी पारडीवाला आणि न्यायमूर्ती मनोज मिश्रा यांच्या पिठासमोर ही सुनावणी पार पडणार आहे. मागच्या अनेक महिन्यांपासून या प्रकरणी सविस्तर सुनावणी झालेली नाही. त्यामुळे आजच्या सुनावणीत तरी कोर्ट काही महत्वाचे दिशानिर्देश देत का? हे पाहणं महत्वाचे ठरणार आहे.

दरम्यान, राष्ट्रवादी काँग्रेस पक्षाप्रमाणेच शिवसेना पक्षाचीही आमदार अपात्रतेची सुनावणी प्रलंबित आहे. मात्र सुप्रीम कोर्टाने पुन्हा एकदा या सुनावणीची तारीख पुढे ढकलली आहे. गेल्या अनेक महिन्यांपासून शिवसेना आमदार अपात्रतेची सुनावणी पार पडली नाही. आता सप्टेंबर महिन्यात यावर सुनावणी होण्याची शक्यता आहे.