Navi Mumbai News : नवी मुंबईतील खारघरमध्ये ज्वेलर्सच्या दुकानात दरोडा; सिनेस्टाईल थरार CCTV कॅमेऱ्यात कैद

सिद्धेश म्हात्रे, साम टीव्ही

नवी मुंबईतील खारघर परिसरात रविवारी रात्रीच्या सुमारास एका ज्वेलर्स दुकानावर दरोडा पडला. दुचाकीवरून आलेल्या दरोडेखोरांनी बंदुकीचा धाक दाखवत ज्वेलर्समधील लाखो रुपयांचे दागिने लंपास केले. दरोड्याची ही घटना सीसीटीव्ही कॅमेऱ्यात कैद झाली आहे. दागिन्यांची चोरी केल्यानंतर हवेत गोळीबार करून चोरटे पसार झाले.

या घटनेमुळे परिसरातील नागरिकांमध्ये भीतीचे वातावरण आहे. याप्रकरणी खारघर पोलिस ठाण्यात चोरट्यांविरुद्ध गुन्हा दाखल करण्यात आलाय. सध्या पोलीस दरोडेखोरांचा शोध घेत आहेत. मिळालेल्या माहितीनुसार, नवी मुंबईतील (Navi Mumbai News) खारघर परिसरात एक ज्वेलर्सचे दुकान आहे.

रविवारी रात्री १० वाजेच्या सुमारास या दुकानात तीन दरोडेखोर घुसले. त्यांनी बंदुकीचा धाक दाखवत दुकानातील लाखो रुपयांचे सोने-चांदीच्या दागिन्यांची चोरी केली. यावेळी दुकानाच्या बाहेर असलेल्या लोकांनी दरोडेखोरांना (Kharghar Crime News( रोखण्याचा प्रयत्न केला. मात्र, आरोपींच्या हातात बंदुक असल्याने कुणालाही काहीही करता आलं नाही.

ज्वेलर्सच्या दुकानाची लूट केल्यानंतर दरोडेखोर बाहेर आले. त्यावेळी नागरिकांनी आरडाओरड करण्यास सुरुवात केली. त्यानंतर दरोडेखोरांनी हवेत गोळीबार करत दुचाकीवरून धूम ठोकली. हा संपूर्ण थरार सीसीटीव्ही कॅमेऱ्यात कैद झाला आहे. या प्रकरणी पोलिसांनी गुन्हा दाखल केला असून आरोपींचा शोध सुरू केलाय.