Fraud : नेव्हीमध्ये नोकरीचे आमिष देत दुबईला पाठविले; २० तरुणांची आर्थिक फसवणूक

सिद्धेश म्हात्रे

नवी मुंबई : आमिष दाखवून फसवणूक करण्यात येत असल्याचे प्रकार समोर येत असताना देखील याला अनेकजण बळी पडत आहेत. असाच प्रकार पुन्हा एकदा समोर आला असून नेरूळमधील एका तरुणाला नेव्हीमध्ये नोकरीला लावून देण्याचे आमिष दाखविले. या आमिषाला बळी पडत तरुणाने संबंधिताला रोख रक्कम दिली. यात साधारण ३ लाख रुपयात फसवणूक झाल्याचे समोर आले आहे. 

वेगवेगळ्या पद्धतीने फसवणूक करण्यात येत असल्याचे प्रकार सातत्याने समोर येत आहेत. बऱ्याचदा जास्तीचा नफा देण्याचे आमिष देत फसवणूक करण्यात येत असते. तसेच नोकरीचे आमिष दाखवत फसवणूक करण्यात येत असल्याच्या घटना देखील घडत असतात. तरी देखील अमिषाला बळी पडून हातातील रक्कम देत असतात. असाच प्रकार नेरूळमध्ये घडला असून यात तरुणाची फसवणूक झाली आहे. 

२० तरुणांना पाठविले दुबई 

नेरूळ एमआयडीसीमधील एक्स.पी.ओ. शिपिंग मॅनेजमेंट कंपनीतर्फे नेव्हीमध्ये नोकरी लावण्याचे आमिष देत प्रत्येकी ३ लाख रुपये घेऊन वीस पेक्षा अधिक तरुणांना दुबईला पाठविले. यात त्यांची आर्थिक फसवणूक केल्याची धक्कादायक माहिती समोर आलेय. नोकरीच्या आशेने दुबईला गेलेल्या तरुणांना प्रत्यक्षात तिथे सदर कंपनी अस्तित्वातच नसल्याची माहिती मिळाली असता तरुणांनी तात्काळ भारतात परतीचे तिकीट काढले. 

पोलिसांकडून गुन्हा नोंदविण्यास टाळाटाळ 

दरम्यान सदर तरुणांनी आर्थिक फसवणूक झाल्याची तक्रार तुर्भे एमआयडीसी पोलीस ठाणे येथे केली असता पोलिसांनी प्रथम गुन्हा नोंदविण्यास टाळाटाळ केली. तसेच आमचीच पिळवणूक केली असल्याचा गंभीर आरोप तरुणांनी केला आहे. त्यामुळे तरुणांची आर्थिक फसवणूक करणाऱ्या या कंपन्यांना पोलिसांचा वरदहस्त आहे का? असा प्रश्न उपस्थित होत आहे.