उतारावर ब्रेक फेल, ट्रकच्या धडकेनंतर कार पुढच्या ट्रकमध्ये घुसली; कारचा चक्काचूर; ४ जणांचा मृत्यू, घाटात भयंकर अपघात

अजय सोनवणे, नाशिक प्रतिनिधी

Four killed in Savala Ghat Nashik accident : नाशिकमधील सावळा घाटात मंगळवारी सायंकाळी थरारक आणि भीषण अपघात झाला. घाटातील तीव्र उतारावर दोन ट्रकांच्या मध्ये कारचा चेंदामेंदा झाला. या विचित्र अपघातात कारमधील ४ जणांचा दुर्दैवी मृत्यू झाला आहे. तर १ जण गंभीर जखमी झाला आहे. हा अपघात इतका भीषण होता की, दोन्ही ट्रकांच्या मध्ये सापडल्याने कारचा पूर्णपणे चक्काचूर झाला.

नेमका कसा घडला अपघात?

मिळालेल्या माहितीनुसार, पेठ-दिंडोरी हद्दीलगत असलेल्या सावळा घाटातील तीव्र उतारावरून एक 'इको' कार जात होती. याच वेळी कारच्या मागून येणाऱ्या एका ट्रकचे ब्रेक अचानक निकामी (फेल) झाले. ब्रेक फेल झाल्यामुळे चालकाचे ट्रकवरील नियंत्रण पूर्णपणे सुटले आणि हा वेगवान ट्रक समोर जाणाऱ्या इको कारवर जाऊन जोराने धडकला. घाटात तीव्र उतार असल्याने मागून मिळालेल्या भीषण धडकेमुळे इको कार थेट पुढे चाललेल्या दुसऱ्या ट्रकच्या मागील बाजूस अतिशय वेगाने जाऊन धडकली. दोन मोठ्या ट्रकांच्या मध्ये कारचा पूर्णपणे चेंदामेंदा झाला.

३ जणांचा जागीच मृत्यू, उपचारादरम्यान एकाचा मृत्यू

या थरारक अपघातात कारमधील ३ प्रवाशांचा जागीच मृत्यू झाला. तर इतर दोन जण गाडीत गंभीर जखमी अवस्थेत अडकले होते. घटनेची माहिती मिळताच स्थानिक नागरिक आणि पोलिसांनी तातडीने मदतकार्य सुरू करून जखमींना कारबाहेर काढले. त्यांना उपचारासाठी तातडीने नाशिक येथील रुग्णालयात दाखल करण्यात आले. मात्र उपचारादरम्यान आणखी एका जखमीचा मृत्यू झाला. या अपघातात एकूण ४ जणांचा मृत्यू झाला आहे. तर एका गंभीर जखमीवर सध्या रुग्णालयात उपचार सुरू आहेत.

घाटातील वाहतूक काही काळ ठप्प

अपघाताची माहिती मिळताच पोलिसांनी तात्काळ घटनास्थळी धाव घेतली. अपघातानंतर घाटातील दोन्ही बाजूंची वाहतूक पूर्णपणे ठप्प झाली होती. त्यामुळे वाहनांच्या लांबच लांब रांगा लागल्या होत्या. पोलिसांनी क्रेनच्या सहाय्याने अपघातग्रस्त वाहने बाजूला सारली आणि काही तासांच्या प्रयत्नांनंतर सावळा घाटातील वाहतूक पूर्ववत केली. या अपघातामुळे परिसरात हळहळ व्यक्त केली जात आहे.