Nashik Crime News : येवला तालुक्यातील कोळगाव येथे दरोडा; दरोडेखोरांच्या हल्ल्यात वृद्ध गंभीर जखमी

अजय सोनवणे 

मनमाड (नाशिक) : नाशिकच्या येवला तालुक्यातील कोळगाव येथे आज मध्यरात्रीच्या सुमारास गाडेकर वस्तीवर दरोडा टाकला. मात्र दरोडेखोरांचा हा प्रयत्न हाणून पाडण्यासाठी परिसरातील एकाने दरोडेखोरांना प्रतिकार केला. मात्र दरोडेखोरांनी केलेल्या हल्ल्यात वृद्ध गंभीर जखमी झाला आहे. शिवाय त्यांच्याकडील काही रक्कम देखील घेऊन गेले आहेत. 

नाशिक (Nashik) जिल्ह्यातील येवला तालुक्यातील कोळगाव येथे हा प्रकार घडला आहे. गावात चोरीच्या उद्देशाने आलेल्या काही अज्ञात चोरट्यांनी गाडेकर वस्तीवर दरोडा टाकत जबरी चोरी करण्याचा प्रयत्न केला. यावेळी प्रतिकार करणाऱ्या कारभारी आनंद गाडेकर (वय ७५) यांच्या मानेला सुरी लावून चोरट्यांनी त्यांच्या ताब्यातील (Crime News) पैशाचे पाकीट ओरबडून नेले. यावेळी प्रतिकार करणाऱ्या वृध्द कारभारी गाडेकरांना दरोडेखोरांनी जबर मारहाण करून त्यांच्या मानेला हातापायाला गंभीर जखमा केल्या आहेत. सध्या त्यांच्यावर येवल्यातील एका खाजगी रुग्णालयात उपचार करण्यात येत आहे,

पोलिसांकडून तपास सुरु 

काळेगाव गावात घडलेल्या या घटनेबाबतची माहिती येवला तालुका (Police) पोलिसांना देण्यात आली. यानंतर पोलिसांनी घटनास्थळी जाऊन घटनेबाबत अधिक माहिती घेतली. यानंतर तात्काळ नाकेबंदी सुरू केली असून दरोडेखोरांचा शोध घेतला जात आहे.