आधी शिवसैनिकावर फेकली काळी शाई, नंतर केला जीवघेणा हल्ला; नाशिकमधील भयंकर घटना

नाशिक : एकनाथ शिंदे यांच्यासह गटाने शिवसेनेतून बंड केल्यानंतर शिंदे यांच्या समर्थनार्थ नाशिकमध्ये बॅनर लावण्यात आले होते. बॅनरवरील शिंदेंच्या फोटोवर काळे फासून आंदोलन करणाऱ्या शिवसेना पदाधिकारी निलेश बाळा कोकणे यांच्यावर अज्ञात हल्लेखोरांनी सोमवारी रात्री हल्ला करुन जखमी केले. विशेष बाब म्हणजे हल्लेखोरांनी कोकणे यांच्यावर यावेळी अंगावर काळी शाही देखील फेकली. त्यामुळे या घटनेला त्या आंदोलनाशी जोडले जात आहे. (Nashik Latest News)

शिवसेनेचे शहर पदाधिकारी बाळा कोकणे यांच्या अंगावर सोमवारी रात्री हल्लेखोरांनी काळी शाही फेकून हत्याराने हल्ला करत त्यांना जखमी केले. त्यांच्यावर उपचार सुरु असून हा हल्ला कुणी आणि का केला याचा तपास भद्रकाली पोलिसांनी सुरु केला आहे.

सोमवारी रात्री साडे दहा ते पावणे अकरा वाजेच्या सुमारास कोकणे हे दुचाकीने एमजी रोडवरील यशवंत व्यायाम शाळेजवळून जात होते. यावेळी दोन दुचाकींवरुन आलेल्या सहा अज्ञात हल्लेखोरांनी त्यांच्यावर पाठीमागून धारधार वस्तूने हल्ला केला. याचवेळी कोकणे यांच्या अंगावर काळी शाही फेकण्यात आली. अचानकपणे झालेल्या या हल्ल्याने ते घाबरून गेले. (Nashik Shivsena Latest News)

दरम्यान, परिसरातील नागरिकांनी तातडीने कोकणे यांना एका खासगी रुग्णालयात दाखल केलं. घटनेची माहिती मिळताच भद्रकाली पोलिस ठाण्याचे वरिष्ठ पोलिस निरीक्षक दत्ता पवार यांच्यासह पोलीस ठाण्यांचे गस्ती पथके घटनास्थळी दाखल झाली. अज्ञात हल्लेखोरांचा पोलीस शोध घेत होते.

Edited By - Satish Daud