'आरोपीचा एन्काऊंटर करा', चिमुकलीवर बलात्कार- हत्या प्रकरणावरून मालेगाव तापले; कोर्टाबाहेर जमावाचा आक्रोश

महाराष्ट्रातील नाशिक जिल्ह्यातील मालेगाव तालुक्यातील डोंगराळे गावात ४ वर्षीय चिमुकलीवर बलात्कार करून तिची निर्घृण हत्या करण्यात आली. या घटनेनंतर राज्यात संतापाची लाट उसळली आहे. डोंगराळे गावातील रहिवासी चिमुरडीच्या न्यायासाठी रस्त्यावर उतरले आहेत. त्यांनी रस्तत्यावर उतरून निषेध केला आहे. आरोपीला तात्काळ शिक्षा झालीच पाहिजे, अशी मागणी करत रहिवाशांनी आक्रोश मोर्चा काढला आहे. पोलीस आणि स्थानिक रहिवाशांमध्ये झालेल्या झटापटीमुळे परिसर तणावपूर्ण झाले आहे. सध्या मालेगावात सर्वत्र पोलीस बंदोबस्त तैनात करण्यात आला आहे.

मालेगावात डोंगराळे घटनेच्या निषेधार्थ जन आक्रोश मोर्चा काढण्यात आला होता. मोर्चामध्ये हजारो नागरिक सहभागी झाले होते. मिळालेल्या माहितीनुसार, तणावपूर्ण परिस्थिवर नियंत्रण मिळवण्यासाठी नाशिकहून अतिरिक्त पोलीस मालेगावकडे रवाना करण्यात आली आहे. परिस्थिती नियंत्रणासाठी वरिष्ठ अधिकारी मालेगावकडे रवाना झाले आहेत. नाशिक परिक्षेत्राचे विशेष पोलिस महानिरीक्षक IG दत्ता कराळे हे देखील परिस्थिवर लक्ष ठेवून आहेत.

दरम्यान, परिस्थिती चिघळलेली असताना आरोपीला कोर्टात आणलंय, अशी अफवा कुणीतरी पसरवली होती. अफवा पसरताच मोर्चातील संतप्त जमाव आक्रमक झाले. जमावाने कोर्टात शिरण्याचा प्रयत्न केला. यावेळी पोलीस आणि जमावामध्ये झटापट झाली. पोलिसांनी परिस्थिती नियंत्रणात आणण्यासाठी लाठीचार्जही केली. पोलिसांनी आता परिस्थिती नियंत्रणात आणलीय. सध्या मालेगावात शांतता आहे.

दरम्यान, संतप्त जमावाने पोलिसांकडे मोठी मागणी केली आहे. 'आरोपीला आमच्या ताब्यात द्या, नाहीतर आरोपीचा एन्काऊंटर करा', अशी मागणी केली. यावेळी नातेवाईक, कुटुंब यासह स्थानिक ग्रामस्थ आक्रमक झाले. नातेवाईकांनी रस्त्यावर न्यायालयासमोरच ठिय्या मांडला असल्याचं पाहायला मिळालं. 'जोपर्यंत मागण्या मान्य होत नाही तोपर्यंत हलणार नाही', असा निर्धार नातेवाईकांनी व्यक्त केला.