Lasalgaon Crime : दत्त मंदिरात चोरी; चांदीचा मुकुट व राजदंड नेला चोरून

अजय सोनवणे 

नाशिक : चोरट्यानी आता देवाला देखील सोडले नसल्याने मागील काही दिवसांपासून घडत असलेल्या घटनांवरून पाहण्यास मिळत आहे. मंदिरातुन देवाच्या अंगावरील आभूषण व दानपेटीतील रक्कम चोरून नेली जात आहे. अशाच प्रकारे लासलगाव येथील श्री दत्त मंदिरातून दीडशे ग्रॅम वजनाचा चांदीचा मुकुट चोरट्यांनी रात्रीच्या सुमारास चोरून नेल्याची घटना घडली आहे. यामुळे परिसरात खळबळ उडाली आहे. 

मागील काही दिवसांमध्ये चोरट्यानी मंदिर लक्ष केल्याचे दिसून येत आहे. रात्री मंदिरात कोणी नसल्याची संधी साधून चोरी करत आहेत. आठ- दहा दिवसांपूर्वीच जळगाव जिल्ह्यातील भडगाव तालुक्यात महादेव मंदिरातून पिंडीवरील सोन्याचा पत्रा व पितळी त्रिशूल घेऊन चोरटा पसार झाला होता. यानंतर आता नाशिकच्या लासलगाव येथील दत्त मंदिरात चोरी झाल्याची घटना घडली आहे. अर्थात चोरटयांनी चोरी करण्यासाठी आता मंदिर लक्ष केले आहे. 

दीडशे ग्राम वजनाचा चांदीचा मुकुट चोरी  
नाशिकच्या लासलगाव येथील श्री दत्त मंदिरातून पहाटे सव्वा दोन वाजेच्या सुमारास अज्ञात चोरट्यांनी दत्त मंदिराची खिडकी तोडून खिडकीतून आतमध्ये प्रवेश केला. यानंतर दत्ताच्या डोक्यावर असलेला अकरा हजार रुपये किमतीच्या दीडशे ग्रॅम वजनाचा चांदीचा मुकुट तसेच चांदीचा असलेला राजदंड चोरून पोबारा केल्याची घटना घडली आहे. 

चोरीची घटना सीसीटीव्ही कॅमेऱ्यात कैद

दरम्यान मंदिरात सकाळी काही भाविक दर्शनासाठी आले असताना हा प्रकार उघडकीस आला आहे. घटनेची माहिती पोलिसांना दिली असून पोलिसांनी घटनेचा पंचनामा केला असून मंदिरात लावलेला सीसीटीव्ही फुटेज तपासणी केली. यात चोरीची घटना सीसीटीव्ही कॅमेऱ्यात कैद झाल्याचे दिसून येत आहे. या सीसीटीव्ही फुटेजच्या आधारे लासलगाव पोलीस अधिक तपास करत आहे.